الأجواد واجـد والمراجـل لهـا كسـّاب=لكن واعـد العشـرة ليـا صـرت جمالـي
يطير الشـرار وكـل نـارٍ لهـا شبـاب =ومن ولع النيـران يصبـر علـى الصالـي
تجارب حياتي معجـزة وادروب أصعـاب =ولقيت الرجـال انـواع والـوان وشكالـي
صديق الشدايد ما خذا منك علـم وجـاب =وسيع الصـدر يضحـك ولا هـو بزعالـي
صديـق الشدايـد لا ينافـق ولا يغـتـاب =يدلـه غريـب الـدار ويـزيـن الجـالـي
وصديق الرخى عقّاب ومصادقـه عقـّاب =شجـاع الحكـي والمـدح بالقيـل والقالـي
وصديق الرخى ما غير صورة ولبس ثياب =يـا ليتـه يبرقـع مالـه شمـاغ وعقالـي
وعنـدي نصيحـه جـد ماقلتهـا لعـّاب =أقـول الصحيـح ونايـم القلـب يصحالـي
ترا خوة أهل الطيـب يالطيبيـن أطبـاب =يطيـب السقيـم وخــوة الاش سـلالـي
تغانم شبابك يا بيض الوجه دامـك شـاب =ترى البدر لو يطلـع قمـر عـود أهلالـي
فلا تهجر المسجد وخلـك ورى المحـراب =ترى روضة المسجـد لهـا منـزلٍ عالـي
ولا تترك اللي يزهمـك خايـفٍ مرتـاب =ترى الذل مـا نجـى الثعـل بـا لتحيالـي
ولا للندى غير الفدى لـو تـروح أرقـاب =ومن ضاع شوره يا خـذ الشـور ويمالـي
ومن با شـرك بالعـذر لاتلحقـه بعتـاب =ولا تشوف نفسـك شيـخ والنـاس عمالـي
ولا تهين نفسك لو تجي بين ضرس ونـاب =وهيبتـك لا تنقـص ولـو ربـع مثقـالـي
وبنت الردي لا يعجبـك زينهـا الجـذاب =تراهـا كمـا المخيـال خيـل وتخيـالـي
ولو شفت حمر خدودهـا وثمـان أعـذاب =لا بـدك تمنـى ليـت مـا جالـك أعيالـي
ولدها لا ياشاف النقـى والملاقـى هـاب =ذليـلٍ بخيـلٍ فيـه خفـخـاف وجفـالـي
أخذ بنت قرمٍ طيـبٍ ساسهـا مـا عـاب =تنومسـك بنـت الشبـل ويجيلـك أشبالـي
أعيال الذياب تصير مثل الذيـاب أذيـاب =وعيـال الثعالـب مثلهـا زهـر الاذيالـي
وفرخ الصقر مثله وفرخ الغراب غـراب =وبـوم الخـراب ايقابـل العـش ويـلالـي
الي صار راسك فوق يا طيـب الانسـاب =فـلا ينحنـي لقـدام رجلـيـن ونعـالـي
لكن الله اللي يكتـب الـرزق يـا خطـاب =هو اللـي يفـك البـاب ويقـص الا قفالـي
ولا يهمـل الا واحـدٍِ عايـفٍ الاشـبـاب =ولا ضيع أحقوق البشـر غيـر الا همالـي
وترى للقصايد كيف والكيف لـه شـراب =وانا ما مشرب الا كيـف راسـي بفنجالـي
ولا طاوع الجاهـل ولا جامـل النصـاب =أقـدم يميـن الحـق واحــط معـذالـي
ولا ني بو الله طيبن إلا مـع مـن طـاب =ومن طاب لي برخص له الحـال والمالـي
أكذب وانا خابـر واجامـل وانـا كـذاب =سنين مضـت هـي صـدق والا يورالـي
تلخبط جهاز المـخ وانهـارت الاعصـاب =وفـورت دمـي وارتفـع ضغطـه العالـي
لكن في رجى اللي من رجى رحمته ماخاب =هـو الواحـد العالـي وهـو ربنا الـوالـي
وهو الخالق الرازق وهو المعطي الوهـاب =لـه الملـك كلـه والكمايـل والاكمـالـي
رحيم علينا رحمتـه تنقـذ المنصـاب =يغيـث الديـار الممحلـه عقـب الإمحالـي
شديد العقاب ويعتق المذنـب اللـي تـاب =عسـى مـا يواخذنـا بسيـات الاعمـالـي
كما قالـه الله فصبـروا يأولـي الالبـاب=ترى الصبر زيـن وكلمـة الحـق تنقالـي
واصلي واسلم عد مـا تنبـت الاعشـاب=ومـا لاح بـراقٍ سـرى يشعـل أشعالـي
على المصطفى اللي وحّد الدين والاحزاب =شفيـع أمتـه يـوم الهوايـل والاهـوالـي