عقارب الساعه وعتم الليل واشراق النهار = تحمل على متن القدر شيٍ يغر الغافلين
الوقت يمضي والليالي لا طوال ولا قصار = والغيب تدبيره وعلمه عند رب العالمين
نبدا صغار وجايز ان الموت ياخذنا صغار = ويمكن نعشي سنين لكن ما تعمّرنا السنين
والشعر ثابت بين طيات الكتاب المستعار = يحيا مع الشاعر ولا يحيا مع المستشعرين
في خاطري فكره وحبيت ابتديها بختصار = قدّام يومٍ مايعرف المسلمين المسلمين
تبكي بنات الفكر من سبّت وفاة الابتكار = تقول وين اللي منسيّنا مقولة (وين) وين ؟
في عالي القمه وعادتها تطيل الانتظار = تذكر وداع الراحلين وتبتسم للمقبلين
بانت عمايمهم وشافتهم على قحص المهار = واستبدلت خدّانها الجردا رياض الياسمين
قدومهم يمحي سموم القيظ ويزيل الغبار = الى متى هم صابرين الى متى هم صابرين
كانك كبير الخوف ماسر الطحاطيح الكبار = وان كان ضاع الطيب قلي كيف اعرف الطيبين؟؟
الشعر ينشر لا صله له في نظام الاحتكار = يملك حظاره مثل ماتملك بلاد الرافدين
ماننكر اللي ساهمو بالذات صناع القرار= نوادرٍ تاكل مخالبهم حلوق العابثين
البعض منهم سجل التاريخ له عز ووقار = بنو صروح المجد لين اثبت لهم حقٍ يقين
والبعض الآخر لو نظرناله بعين الاعتبار = يمشي على حكمه تقول اقسى على القاسي يلين
عند البشر عالم يسمونه زعيم ومستشار = ولو نسأله بالفيزيا يشرح حقوق الوالدين
مهزوم والمهزوم لو ينسا طموح الانتصار = يموت ماقالوله انك صرت ضمن الفايزين
اللي بلاه الله من التقصير بيدينن قصار = لا يكثر الشرهات بمصافح طويلين اليدين

كانك كبير الخـوف ماسـر الطحاطيـح الكبـار
وان كان ضاع الطيب قلي كيف اعرف الطيبين؟؟


نص مرصع بالشعر والحكمة