بالقاف أسلـي خاطـري كـل ماظـاق= مثايل تطربه لاجاه ضيقـه
مع النسيـم وداجـي الليـل تنسـاق=أولـه لهـا ولـه القلـوب العشيقـه
أسس قواعدها علـى بيـض الأوراق=وابني عليهـا مـن البيـوت الغميقـه
من شأن من يطرح لها السمع يشتـاق=ونقادهـا مـا أبغـا يجيلـه طريقـه
ولمعانقي تشتاق مـن كـل الاعمـاق=وتنقـاد بيـن الثانـيـه والدقيـقـه
ولا اقول انا في ساحة الشعر عمـلاق=انــا كسيـتـه ثـوبـه ابوذليـقـه
ماكل مـن ينطـق يقـال إنـه نطـاق=يحكـم عليـه إيـلا تكـلـم نطيـقـه
ولاكل رمـاي(ن) يقـال انـه تفـاق=ولاكل صيد(ن) من قنص لـه يعيقـه
وإن جيت بوصف من التواصيف مالاق=بحث(ن) عن إعجاب الوجيه الطليقـه
أختـرت مايطـرب رفيعيـن الاذواق=ومـن الزلـل حصنتهـا بالحقيـقـه
حقيقة(ن) ماهيـب تحتـاج ميثـاق=تشهـد لصحتهـا العقـول الوثيـقـه
عن ما تشوف أعيوني مـن التفـراق=فـي سيـرة الدنيـا وطبـع الخليقـه
وأبدى وأقول الطيب من فضل خـلاق=ومـن لاوهبـه الله يظيـع طريـقـه
والناس ترفعهـا المراجـل والاخـلاق=يوم الـردي كسبـه عـداوة رفيقـه
وهذا يجي لقرابـه اظـلال ورواق= تجذبـه للطيـب الاصـول العريـقـه
وهذا يلامن طاب طيبه تلصمـاق=مثل السـراب يـزول عجـل بريقـه
وهذا نظر عينـه رفيـع للآفـاق=وهذا عيونه في الأمـور الدقيقـه
وهذا براسه من الصواديف دناق=يصد عنها لـو تجـي فـي شقيقـه
وهذا يلا نشفت من الحمل الارياق=يشيل حمـل اللـي عجـز لا يطيقـه
والبلشة اللـي مـا تلهمـد وتنسـاق=اللـي لخـو مـره رحـول ووسيقـه
اللي لربعـه حرقـة اكبـود وإرهـاق=خلقـة وبـا ماينعـرف لـه طريقـه
اللي طـرد المقفيـن شفـاق=ومن كثر هرجه بالقفـا نشـف ريقـه
بين الخلايق عايش بالتلزاق =وعينه علـى الغـرات دايـم مويقـه
وإذا درى ان الوضع قـرب التوهـاق=جوده ومجهـوده يجـي فـي طقيقـه
مايدري إن له في المطاليـق معـلاق=يحشم جنابـه لجـل حشمـة فريقـه
حلو اللسان اللي مـع الوقـت بـواق=مـا أشبهـه كـون العبـاة الرقيقـه
هذا لك أفضـل بيـع جمعـاه بفـراق=من قبل تصبـح منـه كبـدك حريقـه
وتمـت وذكـر الله مبـدى ومغـلاق= قاف جذبتـه مـن البحـور العمقيـه