حيا الله إرسالتك يازين واهلا هلا =تسلم يد سجلتها وأرسلتها وجات
هذا كلام الوداد العذب ولا فلا =يحتاج بين الحبايب عشق ومراسلات
لاتحسب إن صاحبك يازين عنك سلا =لا والذي نزل الفرقان والعاديات
يازين حبك على وصف اللسان إعتلا =تجاوز المستحيل وصار من المعجزات
لو تبغي أعلن غرامي فيك عند الملا =قلته ولاهمني ماقال راعي الشمات
حكمتني مثل حكم الغرب في كربلا = بس انت غزوك بلا قصف وبلا طايرات
غزيتني بالتغنج والدلع والحلا =ونظرة عيون لعشاق البها فاتنات
لاغبت عنك ثلاث أيام جاني بلا =وعيني من الشوق ماتهنابحلو المبات
اعيش بين البشر والفكر بأرض خلا =يصيب فكري على غيبتك عني شتات
وإن جا اتصالك يشاليني ولابه شلا =شلاي في شوفتك ياسيد المترفات
لاشفتك أنزاح من القلب العنا وانجلا =ونسيت كل العذاب وقلت مافات مات
لجل إنك تستاهل العشق النقي والغلا =وتستاهل أحلى القصايد وأكبر التضحيات
عالي ولا تعشق إلا من يعشق العلا =للاش ما أرخصت نفسك مثل بعض البنات
لك مني الود والعهد الوفي والولا =يانهر دجله عطاك العهد نهر الفرات