يا صاحبي ليش تذبحني وانا مذبوح=وانا ادّخرتك ليوم الحوج تكفيني
ما كنت اظنك تخليني كذا وتروح=انــّـده عليك في بقايا صوت يبكيني
ما كان هذا العــَـشــَـم يا صاحبي مسموح=كم كان معنى الاخوه فيك يشجيني
عطر الخيانه بانفاسك غرام الفوح=اوفيتك العهد والنكران تقضيني
شفت الشماته بعينك بوح ينطق بوح=كنــّـك باخر زمانك تنتقم فيني
كان قبل داري حنايا القلب لك مفتوح=واعطيك من غير تسألني وتطريني
واليوم ظهر الجمل فوق العنا مطروح=ميت عطش وانت كفـّـك فيه سكيني
ودك تشوف كل شي فيني ألم وانوح=محال يا صاحبي لو كنت تدريني
انا وحضن الشقا نعشق هوى مجروح=وانا رضعت الوجع حاشا توطيني
البحر لو ذاق ريقي قال لك مملوح=والشعر اجمل عذوبه يوم يرثيني
ما ياخذ الرروح الا من خلقها الروح=والموت لا جا .. فحيـّـا به وسط عيني
ما كنت تخفيه شفته منكشف مفضوح=من كل ذرة غلا لك حيل عزيني