وينك حبيبي بحالي أه لو تدري=يا بو محمد حشايا يندهك مشتاق
ويني عيونك ذبل من بعدها عمري=واحس بركان حزني فجــّـر الأعماق
يا بوي وينك أضم لفدوتك صدري=من رحت يا بوي دمعي مغــّـرق الاحداق
البيت من بعدكم يا بوي وا قهري=يطويه صمت المعاني غايب الاشراق
حتى ثيابك غدت في شمــّـها عطري=حتى نعالك بقت في ناظري ارهاق
ما زال صوتك يناديني وانا اجري=واقول لبيك يا الغالي خفيف الساق
معقول ما عاد باشوفك متى تطري=أبيات عشقك ألا ..يا حسرة العشــّـاق
ياليت قبرك حبيبي كان هو قبري=ياليتني كنت من شالوه بالاعناق
اهذي بحبك وطيفك لا هذى يسري=يجتاح كلي وانا كلي غدا احراق
يا بو محمد كذا تقوى على هجري=كذا تخلي ضمايا يسرق الأرياق
سكين شوقك ذبحني وانكسر صبري=وكل مجرى لأنفاسي وربي ضاق
الجامع الي تصلي فيه من بدري=يسأل عليك يا حمامة مسجد الاخلاق
لله روحك تعالت لحظة الفجري=صليت فجرك وجف الدم بالأعراق
ضميتكم يا حبيبي في وسط حــِـجري=تسقط دموعي على وجهك كما الأوراق
كفنتكم يا حبيبي والأسى شطري=تركت ذكراك يالغالي عــَـلــَـم خفاق
أرثيك يا بوي في أبيات من شعري=وسيل شوقي احسه مندفع دفــّـاق
رسايل الشوق يالزاجل بها طيري=ودمع عيني وربي مرتمي ما فاق
اتقلب الليل كني مفترش جمري =والنوم والله جفني مالمس أو ذاق