مال الليالي لون في غيبة النور = الا السواد اللي يلف السهارى
الحب : مزج ارواح من دم مهدور= في ديننا ولا في دين النصارى
والقلب : بيت اشباح مبني ومهجور= لاصار خالي من غرام الحيارى
أنا لبى مبسمك وعيونك الحور =قبلك وبعدك ماهويت العذارى
غني جاه ونفس والحال ميسور = وفقير وصلك ياغناة الفقارى
بعض القصايد وبلها ينبت البور = ولا بعض منها سوالف سكارى
تلقى الذهب في خزنة العقل مصرور= وتلقى المعاناه بقصيد البطارى
لابد تضحك غصب لوكنت مقهور=وتداري اللي مستحيل يتدارى
لاصرت شاعر جزل من دون جمهور= وعليك صكات الليالي تبارى
وفي المهزله ماتعرف تطّبق الدور= والمصلحه عمّت نهاراً جهارى
تتعب على "مشكور " ما انته بمأجور=والصبر مما شاف قام يتوارى
كم شاعرٍ ماعنده إحساس وشعور =شعبّيته بين العرب ماتجارى
مدري طبيعي نتبع العمي والعور = ولا العرب ماعاد فيهم غيارى
اليوم صار الشور مع تايع الشور = واغلب مايرثع فالبشوت الطفارى
لكن ترى مدح الردي يعتبر زور = لا احدٍ يساوي باليمين اليسارا
كم بشت وسطه زول منهي ومأمور = لا له شداد ولا بناخي سدارى