ليل وسهرونجوم قامت تهاوى =يحذف بها الله كل شيطان حذفي
والكون كلّه فى عيوني تساوى =مافيه فارق بين امامي وخلفي
وفى موقعٍ عن كل عينٍ تزاوى =جلست مع فكري وخدّي وكفّي
وجات المشاكل كل ابوها تخاوى =ولو كان مشكل واحدٍ كان يكفي
سرَت عليّ اذياب همّي تعاوى =وابديت وحدي كل شي امتخفّي
ايقنت مابه حي يرحم وياوى =ولابه عيونٍ لاجل حالي ترفّي
لكن ذكرت اني قوي واتقاوى =باللي لياضاقت وجدته بصفّي
قال ادعني وانا مجيب الدعاوى =ورفعت تال الليل لله طرفي