شبكة رهب الأدبية-ريما محمد السديري - بالله عايدني ترى الليله العيد

قصيدة للشاعر المبدع فهد المفرج اتمنى تنال على إعجابكم

قل عيدك مبارك ترى الليله العيد
عيد الفطر ماهوب عيد الضحيـه
وش ينبغى بالعيد مادامـك بعيـد
وش ينبغى به وانت زعل ٍ عليـه
حب العرب ينقص وحبي لك يزيد
حبك صواب وحب غيرك خطيـه
اسهر الى نامت عيون الاجاويـد
مير الله اقوى ياالعيـون الشقيـه
لاتحسب اني سالي ٍ يااتلع الجيـد
تطري عليه كل صبـح وعشيـه
وحياة رفاع السما مـروي البيـد
انـي عليـل وعلتـي باطنـيـه
ذبحتنـي ياحـول يافاتـن الغيـد
اثرك خـوي ٍ مايراعـي خويـه
لولاي اداري الهرج وادرا المناقيد
من خوفتي لايكثر الهـرج فيـه
لانهبك في غفلة عيون الحواسيـد
واسكن انا واياك بـارض ٍ خليـه
تبي الصراحه ياصدوق المواعيد
الحال من عقبـك تراهـا رديـه
عز الله انك ظبي من شرّد الصيد
واتعبت سادة قنـص وبوارديـه
لايامهددنـي بالابعـاد تهـديـد
يكفي التفاته منك تحسـب هديـه
بالله عايدني تـرى الليلـه العيـد
عيد الفطر ماهوب عيد الضحيـه

(وكل عام وانتم بخير)