مجنونه الفرقا, ومدعاه للكَبْت=تَنبَت بها الوَنَّه, ويصدح لها الناي
في صدري المكبوت!..للحزن رَتَّبْت=مجلس.. وانا! صار اشهَب الهَمّ مركاي
وللبُعد طبت.. ومن عنى البُعد! ماطبت=كَنِّه يبي عَزْلي,وطَردي,ومنفاي
ياهو غيابٍ مع مداده!..تشَعَّبْت=كِلِّي.. وتاهَت سِكَّة القلب بخطاي
يامِبعِدٍ بي لين تِهْت وتَغَرَّبْت=من غِبْت! مَعرِف وش كياني ومَعناي
أدميَت قلب الجَرْح بالبُعْد..والهَبْت=إحساس جَمْر الشوق من نار الاِقفاي
وش طَوَّل اليوميَن؟..ليَن اوشَك النَبْت=على اليِباس..وقيَظ فرقاك شوَّاي
الأربعا سافَرْت واِعن البَلَد غِبت=وتقول: يوم السَبْت من سَفْرِتِك جاي!
واليوم! راح السَبْت,والسَبْت,والسَبْت=سَبتيَن..والثالث! حداني علىْ اقصاي
أبطيت بغيابك,وبالَغْت,واسهَبْت=وانا انتظر سَبْتٍ معه غاية اِمناي
ماتدري اِنِّك في شِتاتي تِسَبَّبْت؟!=مِمّا حَجَب فكري عَن الحَلّ والراي!
ياخي تراك اوعَدْت,واخطيَت,واذْنَبْت=تعال واِنثر وَرْد عذرَك بدنياي
مانيِب قايل: وِش غَنايِمْك؟وِش جبت؟=(شوفَتْك!..تسوى مال حاكِم بروناي)
هاذا وانا! مااَقول عَن شوفْتِك تِبْت=ورَبّي! مراقبني..ويَعلَم نواياي
عَن مابقلبي مِن وَلَه! قلت واعرَبْت=وشوقيْ لك! اصبح ميزةٍ من مزاياي
ومن طيِب قلب الاربعا!..صَدَّق السَبْت=والسَبْت من كثره!..حَداني علىْ اقصاي