ياتل قلبي تلة سبوق عماش = لامن نوى النيه على سيد الحوش
يتلها ناوي على الصيد يعتاش = ولامن زهمته ينتخي تقل مغشوش
تلة سبوقه شدة الكف والجاش = وإليا كفخ لاشك ماراح بلوش
ماقد خبرت إن قلت مع تلته ماش = لامن غدا الباطن قوانيص وطروش
معه بني جنسه إلياصار مطراش = مأحدٍ يحصلّه من الصيد عرموش
عجيب في طبعه ولاهو بغشاش = وأركد من المبلي على جرعة الروش
صافي وقلبه صافي أنصع من الشاش = ومعوده من غير قيدٍ وكلبوش
ونيس في كل المزايا إلياشاش = أفحج حمر يزها بطلعه على النوش
وياما حلا تفريعة الطلع مغباش = ويازين نزعة برقعه تقل طربوش
زوله على كفي كما الشهد بغراش = والنحر كن بحب رمان منقوش
أوهو كما كاس الذهب نقش نقاش = ناقش عليه المحترف فن شاكوش
شلال ريشه به شقارٍ وميّاش = لون الجمر في ماقد النار مطشوش
ولاغز عنقه وإنتخا كنه الباش = حالف يمين الخرب مكفوش مكفوش
أنا أشهد إنه لأبرق الريش يهتاش = من لاحظه كنه مروع ومخروش
وجه السعد لاصار جوي به طشاش = وسيليّة البارح تحوش الحصى حوش
لاجا مجال الطلع بفياض ودشاش = يكشف فضاي وماعلى القاع مفروش
يطرب مثل مسحوب طاروق حشاش = مع مزة التمباك موشٍ بأثر موش
كريم كف ولاعطا يدّي الكاش = ويفوح طيبه فوحة العطر مرشوش
من مثله اللي لاغزى يبطش إبطاش = كنه شهابٍ لاشهر يرهب الغوش
بأسهام عينه نظرةٍ تدوش إدواش = كنه إبن لادن يهدّد إبن بوش
صقر الصقور إلياغدا الكون وشواش = حامي حمى يغني عن جموع وجيوش
وافي وفي له فزعةٍ تقمع الواش = لاهو بمتخاذل ولاهو بمرعوش
له رفة الخرشا إلياصابه إخراش = وله هيبة الحارث على مرتع وحوش
وله خفقة البارق وله لمحة إفلاش = وياطيبه اللي لاسمع إسمه يشوش
وله سطوة الفيصل على غارب اللاّش = وله خوة السرحان تبرا لعلّوش
أخشا عليه أحيان لاغط لأحواش = قفرٍ تخافق به حراسه ودنبوش
وشعاد لو نبته بساتين خشخاش = وترابها زيبق حمر والحصى قروش
صارت غرام أهل الصقاره والأدباش = كلن تمنى يشوف ماكان مخشوش
من كثر خوفي صرت أذريه بقماش = عن لاتشوفه عين حاسد وقاشوش
لأجله عيوني ذي غطا وهذي فراش = ومن لامني في حب عماش مربوش
حيثه يمثل بالقنص طاش ماطاش = بطولته عماش والخرب مبطوش