يازين ياللي خذيت القلب في زينك = يامجرماً بالبشر مايشهر سلاحه

الله على مافعلت بقلبي ايعينك = اسرفت به والخساره تسبق ارباحه

سهم المنايا على مقرن حجاجينك = ورموشك السود تسبى العقل بالراحه

كن الزهر منبته برياض خدّينك = والصدر قسمين تفاحه وتفاحه

ولّعت نار الخطر بالعمد بأيدينك = تنورتك ضيّقه والناس لماحه

قرّبت ذود العواطف من ميادينك = والذود راعيه حول حماك مسراحه

ابا اطلبك حق بالتعريض وادينك = سحرك غزا القلب بالنظرات واجتاحه

كان انت راعي وفا قدّم براهينك = القلب جرحه يطيب بعطف جراحه

ماقلت لك قابلاً وردك وسكينك؟ = من كان قبلي شكر معروف ذباحه ؟

اغليك انا وادري العشاق مغلينك = من انت تغلي؟ هنا الاشواق فضاحه

اطمّنك حول سرّاً بيني وبينك = صندوق الاسرار عندي ضاع مفتاحه

ارجوك رح بالخفا لا طحت من عينك = بحر الهوى ماوصل شاطيه سباحه

ياماكر الزين يا ما احذر شياهينك = من ماكراً له بضلع وفوق لولاحه

شاعرك يمّك يشدّنه عناوينك = لعيونك اكتب قصايد واحرق الساحه

اطـمّـنــك حــــول ســــرّاً بـيـنــي وبـيــنــك
صندوق الاسرار عندي ضاع مفتاحه


الشاعر

عبدالله المفضلي الشمري

أبدعت في الوصف

صح بوحك

ودمت بخير

اطمّنك حـول سـرّاً بينـي وبينـك
صندوق الاسرار عندي ضاع مفتاحه
ارجوك رح بالخفا لا طحت من عينك
بحر الهوى ماوصل شاطيه سباحـه