بشعرك هالمجعد والعيون اللي ملاها النور = ملكتي قلبي المضنى وصرتي خيرة احبابه
ترى مالك شبيه ٍ لا في الدنيا ولا في الحور = زعلك اليوم يا ساره عجزنا نعرف اسبابه
خذي قلبي خذي عقلي ومليها فرح وسرور = وعقد الحب خلينا نقوم ونكتب كتابه
أنا اللي في وصوفك والجمال أكتب بكل شعور = ويصبح ما كتبته من شعور أبيات جذابه
خذي عقلي وسوي به بقايا عقدك المنثور =وخذي قلبي وطن وتحكمي في ساير أبوابه
وبنِّي في فؤادي يا نظر عيني فلل وقصور = ولا تبدين للحاسد ولا تطرين له جابه
تهني وأسكني قلبي ترى هو بيتك المعمور = وقلبٍ يشملك عطفه ضلوع الصدر حجابه

قالوا غريب الدار من فارق الدار =قلت الغريب اللي قعد وسط داره
اثر الزمن في طيته يحمل أسرار=واذا تفشت صار فيها اثاره
وأنا اعرف إن الوقت بالعمر دوار =مع كل رفة عين يخلف مداره
تاريخ عمري يحمل ادوار وأطوار=أعلن علي بدون حرب انتصاره
يا ربنا تجري بحكْمَتْك الأقدار = اجعل في أقدارك لقلبي بشاره
يا قلب خلك لأجل ترتاح صبار=لا خير في قلبٍ يقل اصطباره
ادري بان البعد من دون ما اختار =واللؤلؤه تفتقت عن محاره
الله كتبها باسم ماهر وبحار= عشرة عمر ماهي عروض التجاره
حاتم اخذ من دارنا نور الأنظار=مبروك يا حاتم قرانك بساره
الله يكرمكم بطولات الاعمار= ولا يعرض كسبكم للخساره