الحب وثقني لو ان ماله اوثاق = متى يحررني ويطلق وثاقي
الله من هم على صدري انساق = يسوقني وانا معه في انسياقي
من كثر ماسبب لمعلوقي احراق = جرى خزين العين جري السواقي
أشرب قراح الماء ولابل الارياق = شراب من حدّه زمانه وضاقي
كني لكاسة علقم المر ذواق = من مرها ماعاد أميّز مذاقي
ياصاحبي من جور الايام وش باق = دام الزمن ضيّق علي الخناقي
جيتك وانا في الحب هايم ومشتاق = من زود حبك مابقالي بواقي
لو لا الهوى مابان حزني بالاحداق = ولو لاك ماطاح المطر بإندفاقي
هل السحاب وهل حزني بالأوراق = وكتبت عن حبي وزود اشتياقي
مشتاق لك وانته تجازيني فراق = كنك تدور مايعزز فراقي
تقفي وأنا بقفايتك مالي اشراق = مثل الظلام اللي عن النور واقي
عطيتك المعلوق وتقول مالاق = ان كان ذا مالاق وش انت لاقي
ياشينها دام انك اتمد بإنفاق = ولاتحصّل غير قل ونفاقي
خلاص ياقلبي كفى حب واشواق = أشقيتني مع قلب ماهوب شاقي
صبرك لو ان الصبر ماهوب ينطاق = يمكن يحررني الزمن من وثاقي