هب الهوى يوم أنصف الليل ليلين=أحيا سنا الجمره و زاح الرمادي
يا فاتنه وش جاك مني تغيـبين=بعدك يعذبني وقربك مرادي
أن كان قصدك يوم غبتي تغلين=الصبر طرّف والليالي عوادي
تجملي لا تفـّرحين المعادين=أنا مناي اللي يغيض الأعادي
ردي بسرعه لا تقولين بعدين=قلبي عليك ومنك حاديه حادي
قضيت من عمري على وصلك سنين=يوم الزمان أمان والجو هادي
أشوف من سود المقانع ملايين=أنتي بوادي والعذارى بوادي
أغليك و أزعل منك وأنتي تعرفين=لا أنتي صديقاً لي ولا أنتي معادي
بفنون تمويه الحقيقه تجيدين=أخذت من طبعك دروس و مبادي
يا شين طبعك تزعليني وترضين=وتعانديني وش يفيد العنادي
أن جيت يمك عن طريقي تروحين=وأن رحت جتني منك دعوة ودادي
تقربيني منك باللطف واللين=وتعطيني الورده وشوك الكدادي
ليتك بهمً صابني منك تدرين=أنام وعيونك تعاف الرقادي
ساطع جبينك بين سود الجديـلـين=مثل القمر مع رايح المزن بادي
سود العيون اللي عليها هلالين=هلالين معكوسين رسم وسوادي
عليك من نظرة ورود البساتـين=أستانست للساقيه والبرادي
عليك من لمحة وحوش الشياهـين=وعليك من رقصة مهار الطرادي
انتي لحالك تامريني وتنهين=والا لغيرك مايهون إنقيادي
قلتي لي أن السر مابين الاثنين=وأقول من فتش قلوب العبادي
وقلتي لي أن الصبر عون المحبين=وأقول أنا صابر وهذا إجتهادي
وقلتي لي أن الحب جماع قلبين=وأقول هذا اللي يعذب فؤادي
وقلتي لي ان الوقت يمكن يجي زين=وأقول يمكن مار ماهو وكادي
سلطان حبك ما يعرف القوانـين=وصبري على فرقاك صبر المهادي
كانك من الجرح الندي تستفيدين=هذي جروحي بالظماير جدادي

سلطان حبك مـا يعـرف القوانيـن
وصبري على فرقاك صبر المهادي

هنا قرأت شعراً عذبا
مساء الشعر عبد الله