طويت أديم الأرض بالعـرض والطـول=جبالها ورمالها مع سهلها
على ركاب العـزم وافكاري خـيول=قلت أدخل القلعه مثل من دخلها
بالطـاير الميمون ناقـل ومنقـول=ومدرِّج الضـَّلع على كـور بلها
قبلي تـروح أفـواج وتعـوِّد فلول=السندباد أيام مجـده نزلها
ما جيت أمثل قيصـر الروم مرسول=حـاولت أحـقق شف نفسي وأملها
وقفت حـاير شـارد الفكـر مذهـول=والنفس ولـَّع في حطبها وجـلها
أربع دول وأنا غريباً ومجـهـول=والناس تصـغـر عند منهو جهلها
غادرتها وأنا أضـمـر الغيض وأقـول=سكانها يسـبق رضـاها زعـلهـا
أمسيت كني عن هـل الأرض مسـئول=عما نضـح لغـط القـلـوب وجـدلهـا
هذا جـزاء النايم من الحـول للحـول=يوم الزمـان مسـاعده ما عقـلها
صـرنا ضـحـايا بين كـذبان وخـبول=ناس ٍ على الدجـّه تلمـّع شـللها
في عالمي سيف التقـاليد مسـلول=ماتت نفـوس المستحين بخـجـلها
روس الرجـال جـمـال والواجـب حـمـول=ما للحـمول ان ثقلت إلا جـمـلها
أبيضـَّت وجيهاً بها الخـير مأمـول=واسـودَّت وجيهاً رداها خـذلها
تعيش يا راس ٍ على الجـود مجـبول=نفسـك جـزاها جـالها من عملها
وللنار يا حي ٍ على النعـش محـمول=يم المقـابر وانت ما أنت من أهـلها
الهيكل العظمي على مـخ مغسـول=يجـنـّب الوضـحـى ويكسـب بدلها
مات الضـمير وتالي الفكـر مشـلول=ولا جـمـَّلت شـبه الثعـالب حـيلها
صـار الذي ما هـوب معـقـول معـقـول=وصل الخـطر للناس منبع مـللـها
ان قـيل مستشفى المجـانين مقـفـول=قـل أكثر العـالم تخـفّي عـللها
حكيمها من جـور الأيـام بهلول=يصـوم ويصـلي ويطـرب ويـَلْها
شيخ الوقـار من أصـغـر أبناه مقـتول=ونفس ٍ بريه تشـكـر اللي قـتلها
سـحـر البيان بزين الألفـاظ معـسـول=غـطـّى على النحـله وبـوّر عـسـلها
ضـاعـت به حـقـوق ٍ لها أحـداث وفـصـول=كـم خـيـِّر ٍ حـاول بها ما وصـلها
باركـت للناجـح بتقـدير مقـبول=غيره خـسر بعـض الدروس وحـمـلها