هذه قصيده عن الغياب ومايتركه من معاناه متى ماحل بين الأحباب..
واليكم الأبيات.. وآمل ان تنال اعجابكم وترتقي الى ذائقتكم

ياوجودي وجود اللي حياته عكاس=عيّت الفاتنه تمشي على اللي يبيه

ماجنى من وراها غير كثر العماس=وان بغى من دررها كسّرت له يديه

اوكما وجد عود ٍ حل بأرض ٍ يباس= الحيا ماوطاها والفقر حل فيه

طرّزت له سنينه من غثاها لباس= والبلا لاعيال ولا رجا يرتجيه

قزّر العود وقته بين هم ٍ وياس= هد حيله زمان ٍ باالردى منتويه

ذاك وجدي على اللي مالحبه قياس= جادل ٍ مع جميع الخلق ماله شبيه

راح وأدري مراحه سبّب الانعكاس= في حياتي وغيّب والمحاني تبيه

غاب راعي العيون السود وأطهر مداس=وانقطع به رجاي وزاد حزني عليه

جايرٍ ياالغياب وكم شكت منك ناس=تستبيحه عذابك دون عذر ٍ وجيه

مالجورك مثيل ولالظلمك مقاس= جيت بين القلوب اللي هواها نزيه

والله انك لياحليت صعب المراس= لاتميّز قلوب ولاتقدّر وجيه

مير ياالله ترد صويحبي دون باس= قر عين ٍ تركها بين رجوى وتيه