سعى من هو سعى بيني وبينك =وعرَّضني وعرَّضك القطاعه
حرم عيني من مناجاة عينك= وفرّق شملنا عقب اجتماعه
بليّا ذنب شلت اليوم دينك =وانا اللي ما نسى حبك وباعه
الا يا زين قلبي في يدينك=ترفَّق فيه يا سبَّة ضياعه
ظنيني لا توحَّى في ظنينك=انا واياك من دون الجماعه
انا اللي حن يوم اوحى حنينك=وانا اللي عنك ما صدِّيت ساعه
وانا اللي بالهوى قلبي رهينك=وانا اللي خافقي عندك وداعه
وانا اللي قلبي المغرم سجينك=وانا اللي لايع الهجران لاعه
وانا اللي وان حكوا بك حاسدينك=لحسَّادك فلا سمع ٍ وطاعه
احبك في قسى قلبك ولينك=لك القلب المعنَّى واتساعه
واحبك يا عسى تبطي سنينك=وانا عن حب غيرك في مناعه
والا يا صاحبي ويني ووينك=عسى لي فيك يالترف ارتجاعه

المشاركة الأصلية كتبت بواسطة عاليـــ السند ــ (المشاركة 220552) اخوي محمد صباحك ورد من طول الغيبات جاب الغنايم وانت جبت الجزيلات جيت بختار لي بيت اعجبني لقيتني اخترت القصيده كلها صح لسانكـ وعلا شانكـ بلا حدود وتحياتي لكـ

المشاركة الأصلية كتبت بواسطة عاشق الجزاله (المشاركة 220553) يااااااااااااااااا سلام صح اللسان اللي كما المسك قوله اشبعت ذائقتي اخوي محمد تسلم على هالقصيدة الاكثر من رائعة

المشاركة الأصلية كتبت بواسطة سفير المعاني (المشاركة 220558) الغالي الشاعر محمد الصقيران الله انه يحييك وما تحمله من شعر بعد الغياب ولكن هذه القصيده تشفع لغيابك اللي نتمنى ان لا يتكرر حيث انك من ضمن الكوكبه الشعريه اللتي لها ولقصائدها من القوه ومن المعنى ومن المضمون ما يشبع ذائقة المتابع والمتذوق ابدعت ثم ابدعت وصح لسانك وعلا شانك مليون ولا يكفون لاهنت وتقبل تحيات

المشاركة الأصلية كتبت بواسطة عقاب (المشاركة 220561) محمد الصقيران مرحبابك يامحمد ومن طول الغيبات جاب الغنايم صح لسانك على هذه الرائعه تحياتي