ياقلب لاتحزن يامال الغنيمه=انسى الهموم وقطها غبة اليم

ماهيب ياقلبي لك اول هزيمه=دايم ومن غزو المجاهيم تهزم

تمشي مع العالم بنيه سليمه=والناس تدفن لك بوسط العسل سم

اليوم صار الحب دقه قديمه=ممدوح فيه الكذب والصدق منذم

وياشينها لاصار حقك غريمه=لاهو ولد خال ٍ ولاهو ولد عم

الأجنبي ماله ياكود الحشيمه=ولا القريب ولو جهل قلت له قم

وياللي بقلبي لك مكانه وقيمه=لا واخسارة حلمي اللي تحطم

بنيت لك بالقلب دوله عظيمه=ويا للأسف كل مابنيته تهدم

حبك طفت شمسه وبددت غيمه=ولا ظن يمطر لو شتاته تلملم

طعنتني واخفيت اداة الجريمه=تقول مالطخة يمناك بالدم

بيني وبينك يوم والله عليمه=ماهوب ينفع فيه كثر التندم

يوم ٍ تقاضا فيه حتى البهيمه=فيه امهات قرون تقضى من الجم