دك الحشى من ماضي الوقت دكّاك =وباب الرجاء عن باقي العمر مصكوك
ملكت شيٍ فاق عن حد الإدراك=وتفويض عن باقي الطريقين وصكوك
والهــــم له بين المعاليق شبّـــــاك=وقفل المحاني من عنى القلب مفلوك
ياقلب لو طيبك مع العالم أغواك=الطيب ما ينفع مع الناس ... ضـرّوك
الطيب في عيون المخاليق خلاّك=عرضة لضحكة كل هافي وصعلوك
ويا قلب لو حلمك عن الهافي الهاك=ولو فيه ناسٍ عن أهل العرف حدّوك
حذرا تغيّـــر باقي العمر مبداك=يا بوك وشلك في الرديين يابوك
الطيب لو ترجيه هالوقت ماجاك=وستر الشكاله تالي الأيام مهتوك
الحنظله ماهيب تجنى من الراك=والراك ما ينبت من عروقه الشوك
لولاك ما عاشوا مع الناس لولاك=وياليتهم عن ساقط الهرج علّوك
كم واحدٍ في ماضي العمر خاواك=ويوم أرتوو من نبعك العذب عافوك
وكم واحدٍ في ما مضالك تهقواك=ويوم اللتفت لينه مع الزمل متروك
بعض البشر في هالزمن داك ودواك=والبعض لا جت حزّة الضيق خلوك
ويا راس لا تتبع سفيهٍ تعدّاك=ولا تلتفت لو بالخثاريق بذّوك
خابرك ياراسٍ على الطيب مرباك =تشوم عن درب المناقيد وتصوك
قد جاك يا راسي من الوقت ما اكفاك =ومن عشرة اللي بالمشاريه برّوك
أنهاك عن طبعك ولا كني أنهاك=لين أنهم عن مقطع الحق ردّوك
والحين مابه شي يا راس يخفاك=ولا يلحقك في اللي مضى ظن وشكوك
أتبع طريق اللي عن العيب عدّاك=وأرض الثنين الي على العز ربوك
وياللي خفوقي صار في كف يمناك=ومشاعري عن كل هالخلق بدّوك
الخافق اللي يوم ناديت لبّاك = وأصبحت مع دم الشرايين مشروك
لا تجرحه دامه على الغير بدّاك=القلب لك ياسيد القلب مملوك
وأنا أدري أن به ناس غيري تمنّاك=وبه ناس في حبي وقربي تحدّوك
والله ما يسوون في الأرض ماطاك=لو كان من كثر الأكاذيب غثّوك
تسابقوا كلن فزع يطلب رضاك=وفي ظنهم عن حب غاليك لدّوك
يا جعل من خان المواثيق يفداك=وناسٍ بأسامي ما تليق بك سمّوك
ناسٍ ليا جاء ذكرك العطر تشناك=ياليتهم بعيون مغليك شافوك
كم جابك الهاجس لعيني وودّاك=وأفز لا جت سالفه فيه واطروك
وكم مرةٍ لا سج في الليل ناداك= لا دكّبه من جاير الشوق داكوك
وصيتي لك كل ما حان ممساك =والنوم طيفه بين الأهداب مسفوك
عيوني اللي طول عمري ترجّاك=سلم عليهم كان في الحلم مرّووك