|
بالهون ياناهب قلوب الرياجيل=لاتدعي درب الهوى وانت حيّال هي لعبةٍ عندك قلوب الحلاحيل=تاخذ بها سجه وتضربها الجال بالهون ياراع العيون المضاليل=ماكل رجالٍ ترا مثل رجال حتيش لو تملك سهومٍ قواتيل=قلبٍ متين ومن ورى ضلعٍ جلال يلزمك عن طبع الرياجيل تحليل=ينقصك بعض العرف يالابس الشال وان جيتني بعطيك عنهم تفاصيل=ماقول عالم ؟ بس مانيب جهال طلعت للدنيا بليا محاصيل=ومن فضل ربي صرت اخرجلي اجيال ثم فضل عودٍ حط قدمي دواليل=ماشٍ على دربه ولاطلت ماطال ولاقصرت دنياي وفت لي الكيل=عرفت فيها انواع....والوان....واشكال دنياً تذوقنا الحلا بالفناجيل=والمر تسقيناه من غير مكيال والخاتمه عن كثرة القال والقيل=ماقل دل وشينة الهرج لاطال عجزت لاميز نهارك من الليل=في كل يومٍ لك خليلٍ وخيّـال قصيدة الشاعر خيّالها قلوب الرياجيل في المجلس على الاخوه شعار المجلس ابداء ارائهم على القصيده وايضاح مواطن الجمال ومواطن الخلل ان كان هناك خلل سواء في الوزن اوتركيب البيت اوغير ذلك بدون تحفظ ولا مجامله.. ولايهمكم ان اسمه بالاحمر ترى مثله مثل غيره. ماهو سالم من النقد. ياالله ياشعارنا همتكم.. قصيدة خيالها بين ايديكم |
انا مانزلت القصيده الا عشان اكون اول واحد
تحت الضوء وخذو راحتكم القصيده قصيدتكم ان شالله تجيني مقطعه ثلاجه وبالعكس رح اتقبل ارائكم وانتقاداتكم بصدر رحب شبيب<< وش عنده حمد السعيد ههه ههه المشكله من الدكتور غسان سر دار |
هلا بـ خيال القصيد مسيكم بالخير جميعاً بدون استثناء . وفكرة المجلس أن ماخاب ظني موجوده بإعداد الشاعر/ زايد الدغماني ولكن حذف تثبيتها سابقاً . عموماً ليس هذا حديثنا بل أجد بأن المجلس يستحق الإشاده مني ومن الجميع . العلم .. أني جهزت تنقيحي لقصيدة عيون الفجر . لكن دام السبيعي عرض قصيدة خيالها للنقد فسوف يتم اعدادها الآن وسيتم طرح ملاحظاتي على قصيدة عيون الفجر فيما بعد . تحياتي للجميع |
هلا وغلا
الله يمسيك بالرضا والعافيه ساع نورالمجلس زايد الدغماني..اخ وشاعر عزيز افتقدناه ونسال الله ان يكون غيابه في خير وهو في تمام الصحه والعافيه وكلنا اخوه ومكملين لبعض الله يطولنا بعمرك ياكامل الاوصاف وهذا من طيبك وبالنسبه للقصائد اخوي شبيب استعجل شوي الله يهديه لاني ادري له سبوع يحدد انيابه علي ولا المفروض بعد ماننتهي من قصيدة الاخت عيون الفجر وانتو بكيفكم القصائد عندكم والي تبونه يصير تحياتي لك وسعدة يا اخ كامل الاوصاف بتواجدك معنا |
مسيت باالخير اخوي كامل الاوصاف
بالنسبه لطرح قصيدة اخونا خيالها قبل الانتهاء من قصيدة عيون الفجر فقصيدة اختنا عيون الفجر طرحتها وطلبت الآراء فيها ولكن لم يكن تجاوب كثير من قبل الشعراء وطرحت انا فكرة تحليل القصائد الجديده في بيت القصيد لذلك تم طرح قصيدة خيالها للمناقشه لحداثتها والرأي للجميع وماانا الا من ضمن حزمه واللي تامرون به انا حاضر . واما انت ياخيالها اعتبرك سياسي تبي تهرب من انتقاد قصيدتك . بس معليك ناقدين قصيدتك ناقدينها الله لايعوق بشر |
الف شكر ياخيالها على استقبالك الرائع ,,
والله يسعد ايامك اخوي . بالنسبه للقصيده .. حقيقة لاأجد في هذه القصيده ألا ملامح من خلفها وأنا أبصم بأنه شاعر معتق بالجزاله . فالقصيده أتسمت بالأسلوب المباشر والتلقائية في الطرح .. وهذا مايجعلها قريبه للقلب . لكن فيه بعض الرتوش إن صح التعبير أسمحلي بذكرها وأجدها لاتؤثر على مثل هذا النص الفاخر . حتيـش لـو تملـك سهـومٍ قواتيـل قلبٍ متين ومـن ورى ضلـعٍ جـلال أختيار مفردة (قواتيل) لاأجدها في مكانها اللغوي وهي جمع لـ قاتل ولكنها غير شائعه اللفظ ومن الملاحظ بأن اختيارها اقحام للقافيه. يلزمك عن طبـع الرياجيـل تحليـل ينقصك بعض العرف يالابـس الشـال يلزمك عن طبع الرياجيل والمقصود فيها يلزمك في طبع الرياجيل . وان جيتني بعطيـك عنهـم تفاصيـل ماقول عالـم ؟ بـس مانيـب جهـال جهال بفتح الجيم وتشديد الهاء وتعني جاهل ولكنها غير موفقه حسب ماأراه في الصياغه وهي مشابهه لمفردة (قواتيل) فمن خلال هذه المفرده تم اقحام القافيه . طلعـت للدنيـا بلـيـا محاصـيـل ومن فضل ربي صرت اخرجلي اجيال (صرت اخرجلي اجيال) لوكررنا لفظها لوجدنا بأن الثقل اللفظي موجود لكنه لايؤثر في الوزن . ثم فضل عـودٍ حـط قدمـي دواليـل ماشٍ على دربـه ولاطلـت ماطـال دخول مطلع البيت في (ثم فضل عودٍ) حسب ماأراه غير متوافق مع تسلسل الابيات لأني لم أجد في معنى (ثم) الاّ قصد التتابع أو المتابع لمابعده . فدخوله كمطلع لهذا البيت أوجد فجوه نستطيع ملاحظتها . أخي خيالها .. أنت شاعر جزل ولاتحتاج لأي تعليق أو تعقيب . لكن فيه نظره قد تختلف من شاعر لآخر . تقديري لك |
اقتباس:
هلابك ياطويل العمر .. ومعك حق وأبد ماهناك قصور الله يسلمك .. وحضورك يسعدني ويسعد الجميع . |
يعطيك العافيه اخوي /كامل على ماقلت وانا اسعد ويعطيك العافيه على التحليل ..جميع النقاط اللتي ذكرتها انا اؤيدها ولقد سبقتنا حقيقه عليها مع احترامي الشديد لخيالها فهو شاعر كبير وله العديد من القصائد اللتي تعتبر درر ولكن هذه القصيده كما فيها من الملاحظات فيها من الجماليات الشي الكثير.. مثل : دنيآ تذوقنا العنا في فناجيل والمر تسقيناه من غير مكيال وكذلك : والخاتمه عن كثرة القال والقيل ماقل دل وشينة الهرج لاطال واضيف ايضا على كلام اخوي /كامل: باالهون ياناهب قلوب الرياجيل لاتدعي درب الهوى وانت حيّال فلو ذكر (لاتدعي حفظ الهوى) لكانت انسب.. عموما نتمنى ان يتقبل خيالها هذ الاجتهاد.. واعتقد ان فيه من رحابة الصدر مايكفي لتقبل النقد. اتمنى لك التوفيق |
هلا وغلا
الاختلاف بالراي لايفسد للود قضيه تقووووول : حتيـش لـو تملـك سهـومٍ قواتيـل قلبٍ متين ومـن ورى ضلـعٍ جـلال الشاعر المتنبي له قصيده في الثناء على حكماء بغداد وكانت قافية القصيده على الالف والذال والياء يعني اذي ولااذكر البيت ولاكنه قال بغذاذي بمعنى انه يقصد بغداد وقصيده للشاعر محمد المغلوث قافيتها على اللام والياء ووصف السياره المرسيدس ويقول في اخر بيته جير ملي ومن المعروف ان اصل الكلمه جير مني وقصيده للشاعر غازي بن عون قافيتها على الواو واللام وقال في البيت... حتى لوانه يملك اموال قارول ومن المعروف انه قارون وهؤلاء كلهم من فطاحلت الشعر والاصل: يا كامل الاوصاف التهديف على معنى الكلمه ومعرفة ماذا يقصد الشاعر وانا جمعت كلمة سهوم من المعروف ان سهم=قاتل...و...سهوم=قواتيل يلزمك عن طبـع الرياجيـل تحليـل ينقصك بعض العرف يالابـس الشـال هذا البيت واضح وحرف في او من او عن لايغير فيه شيء وان جيتني بعطيـك عنهـم تفاصيـل ماقول عالـم ؟ بـس مانيـب جهـال ترجع مثل كلمة قواتيل مثل ماقلت ومثل ماذكرت في السابق ان المتلقي يفهم معنى الكلمه ومقصدي منها طلعـت للدنيـا بلـيـا محاصـيـل ومن فضل ربي صرت اخرجلي اجيال من الممكن ان تكرار حرف الجيم في كلمة اخرجلي وكلمة اجيال هو الذي يدع لفظها ثقيل في النطق وليس ثقل في البيت لان على حسب ماارى انا انو الثقل في البيت والكسر واحد ثم فضل عـودٍ حـط قدمـي دواليـل ماشٍ على دربـه ولاطلـت ماطـال ماذا يأتي بعد لفظ الجلاله في تقديم فضل الخالق عل المخلوق كلمه واحده فقط الا وهي كلمة ثم مثل قول لولا الله ثم فلان وانا ذكرت كلمة فضل وهي فضل الخالق لابد ان اذكر ثم فضل المخلوق من فضل الله ثم فضل عودٍ حط قدمي دواليل اعتقد ان فيه ربط لما قبله اخي كامل الاوصاف اشكرك على انتقادك الصريح اللذي اتقبله واحترمه بكل صدر رحب ولكل منا وجهة نظره واتمنى ان تتقبل توضيحي لكي اوصل اليك وجهة نظري التي كتبت عليها القصيده تحياتي,, |
السلام عليكم
مساكم/ وصباحكم بالخير ياااارب ياربي حي شعارنا ان شاء الله تكونون بخير وعافيه جميع منورين القسم بذا الاجتماع والحوار الراقي وانا الصراحه جيت اسلم واتقهوى وأمشي على قولتهم بارك الله في من زاور وخفف . رساله خاصه الى سردار تسأل عليك العافيه يااارب صحيح انا مسافر برى وابشرك يابوحسين انا بخير وعافيه ومستانس مقناص وهدة طير ووناسه ويمكن دخلاتي المنتدى صارت خفيفه لظروف الاتصال عندي والصراحه الصراحه نفسي انك معي. ياهلا والله بشعرائنا ومشكورين على حسن الضيافه واكرمكم الله. تحياتي . |
| الساعة الآن 03:59PM |
Powered by vBulletin® Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية