سألت الشوق هوجاسي , سألت الليل والقمـره=غيابك حيّـر افكـاري , ولاهمـك ولاتـدري
قدرت تغيب ياقاسي , قـدرت تولّـع الجمـره=اساهر هجرك بناري , وانت تزيد فـي هجـري
سقيتك وصل في كاسي , سقيت الحب في جذره=كتبتك احلى اشعاري , وربّعتك علـى سطـري
وحطّيتك على راسي , وامرك كنت فـي أمـره=وسكّنتك وسط داري , ودارك بالهوى صـدري
عطيتك كل احساسي , ولك فاح الهوى عطـره=وبعت الحب واسراري , ولا فكّرت في قـدري
كتمت الشوق بانفاسي , شهقت الشوق في كسره=ولا لك حس واخباري , سوى ذكراك في غدري
طرقت بهجرك اجراسي , قطعت الحب في جسره=تخون القلب وتداري , ووزعته وهـو حصـري
تجي هالحين ياناسي , ولا لك عـذر فـي عـذره=وش العنوه وش الطاري , تبيـع بحبنـا تشـري
ترى شرع الهوى يواسي , وانا اواسيك في بكـره=ولك عهدي وإقراري , توكّـل لاتجـي بنهـري

شاعر واترجـم بالاحاسيـس غالـي=واملى حدود الكـون للّـي عشقنـي
فينـي جـراءة شاعـر (ن) مايبالـي=ما يحسب احسابـه لـو انـه هزمنـي
وفيني بـراءة طفـل خجـلان تالـي=مايرمـق النظـرة بلحظـة نظـرنـي
وفيني من الاحساس نبـع (ن) جرالـي=ارقّ مـن شـفّ المطرلـو لمسـنـي
ولـي خافقـن يدفـي بـرود الليالـي=ينهز ضلـوع القـاف لحظـة نهزنـي
واحـرك اشجانـي وافجـر حوالـي=مليون شاعر وسـط شاعـر كتبنـي
واشـب نـار الجـزل اليـا هنالـي=بمداعـب القيفـان لحظـة امـرنـي
وارسم على بيـض الـورق ماجرالـي=واخلق حروفي لو سهـرت وسهرنـي
احس فينـي شعـور سكـر وحالـي=اليا طـرى للشـوق طـاري لزمنـي
ياناعـم الكفيـن نـورك ضـوالـي=والصمت كبّلنـي وجرحـي ملكنـي
عايـش انـا مابيـن ذاتـي وحـالـي=تعبت بسكاتـي ولاحـد (ن) سمعنـي
يابنت فينـي جـرح وصفـه خيالـي=صمتي جروح وجرحي اللـي امرنـي
يازيـن قبـل العشـق افهـم سؤالـي=كم عشق يسكن وسط قلب(ن) كسرني

بس ابسأل يامهاجر في هجيره = هو بقى للوقت فينا شي اسهل
واللا اصعب وقتنا فينا مصيره = واللا ماللوقت فينا وقت يقبل
هو يبينا نحسب بليّا بصيره = واللا هو بالوقت ضاق وييتملّل
هي عيون الناس صابتنا جهيره= واللا وضع الكون واقدار المعلّل
واللا اّّنا واللا انتي واللا غيره = واللا طبع العشق فينا دوم يجهل
واللا شي (ن) ماعرفت افهم وتيره= ما قدرت اّّحلل اسبابه تسلّل
واللا هو حاسد وحاقد فيه غيره = مايبي قلبي وقلبك قال ابزعل
ليه بدري ليه يعني وش يضيره= لو نسانا شوي واغضى ثم اغفل
ليه صحّى عين تحلم في قريره = ليه يفزع هنوة العشق وتغفّل
ليه يذبح طفل يضحك وش يضيره = هو نسى انه فرحنا واللا يجهل
وان نور العمر يضوي في مصيره = وان عطر الليل فايح يوم اقبل
وان كل احساسنا سافر لديره = بدّل احلام الهنا ظلمه وظلّل
وان ورد الشوق صابه زمهريره = ريحه البارد حرق قلبي وعطّل
تدري اني كل وقتي عشت سيره = سيرة العاشق وعشقه يوم يرحل
بس ابي تعرف بأني جيت حيره = بصوت هادي قلتها لك بس ابسأل

ادري انا في واقعي عشت احلام = وادري عطيتك فيني اشياء كثيره
مانقض عهودي لا ولو طالت ايام = والحرّ مايخلف وعد في عشيره
قسمت لك روحي على شاانك اقسام = قلب (ن) وعين وعقل لاجلك سهيره
وقسمت لك قلبي على العشق بهيام = شوق ووله واحزان واحيان غيره
وقسّمت لك حرفي على الشعر اقلام = نبْط وفصيح ونثر ودروس سيره
وقسمت لك عقلي على الفكر افهام = حلم وخيال وواقع (ن)عاش حيره
وقسمت لك عيني بنظره و سلهام = لاجلك وغيرك غظّ (ن) ولا اعيره
وماهمني في اللي مضى لي ولو ضام = لنّي على عهد الهوى في مصيره
وادري انا في واقعي عشت احلام = وادري عطيتك فيني اشياء كثيره
وماني على مافات ياصاح ظلاّم = طويت في هجرك دروب(ن) عسيره
وابيك تدري اني الحين مانلاّم = على وجودك حلم شخص واميره

ياصباح الورد ياورد وعبير = يالزيم الشوق واهداب السهر
يا زلال القطر يااحلى غدير = يانفيس الناس يا عمر وقدر
ياعيون الكون والقلب الكبير = يا امان الروح ياليل وسمر
عينك التحنان ودروبك مصير = مرهف الاحساس مامثلك بشر
تجرح احساسي واكابر واستثير= من غلاتك طيبتي بعد القهر
لو خطيت ادمح واسامح واستعير = من عيونك رحمتي بعد النظر
اكتم الاهات لو كانت كثير = وازفر اشواقي وعشقي في نهر
اتعب واشقى حبيبي واستغير = لو يلامس بشرتك رشّة مطر
عايش(ن) في كوكبك قلبي اثير = في سديم الكون لك نور واثر
اشهد اني فيك مغرم والاسير = عايش (ن) لاجلك ولاغيرك امر
لو هجرت القلب لو مهما يسير = ما اخونك لو غيابك لي دهر
مانسيتك وانت في وسط الضمير = الله اكبر والوريد اصبح ممر
في غيابك نجمهم صاير صغير = في حضورك وضعهم محدن حضر
لو حسبنا الفرق بحساب (ن) يسير = ضاع ضو النجم مع ضو القمر

لا تعاتبني ترى كثر العتاب = شتت احساسي ولا اقدر اجمعه
للعتب يا صاحبي الفين باب =تجمعه فيني وقلبي يمنعه
من سأل لا بد مايلقى جواب = وانت تسأل باب دايم اسمعه
العتب يشبه ترى درب الحساب = يتعب العاتب ويتعب من معه
يقطع عروق المحبه بالعذاب = يظلم شعور الهنا ثم يقمعه
يسلب اسباب الرضا بالاغتصاب = للفرح حاجب ودايم يرمعه
يفرض اسلوب (ن) يجيب الاكتئاب = يحرم العاشق ولاهو يشبعه
يحرق اوراق الفرح والاقتراب = يرمي القلبين وسط المعمعه
المحبه والرضا والانجذاب = والتفاهم هي اصول (ن) اربعه
من جمعها عاش حبه في شباب = وشيبها شرع العتاب ومسمعه
من فقدها بنظرتي وضع الغياب = للمحب اهون ولو هو يدمعه

ضاعت عناويني على كف الاحزان=دان الحزن مني وانا منـه دانـي
عمري مضى بالحزن واقع وعنوان=لا شافتـه عينـي لقيتـه طوانـي
الحزن اتعبته وانـا فيـه تعبـان=مكتوب له فيني وانا فيـه اعانـي
كني سفينة تايهه وسـط طوفـان=ربانهـا ضايـع يـدور مـوانـي
الحـزن ياسـادة اذا زار انسـان=ااسـر ومستعمـر وذلـه هوانـي
كله سبايب بعد مكحـول الاعيـان=اللي حرق قلبـي وبعـده شوانـي
راعي العيون الناعسة ام الاوطان=اللي بها شيـدت قصـر الامانـي
اللي على فرقاه انا عشت حرمـان=كني سجين الدهر والدهـر جانـي
مـاراح متعنـي ولاهـو بغلطـان=حكم الزمن يفرض وفرضه كوانـي
في كل ليلة اذكره اذكـر اشجـان=صوته ورسمه والحكي والاغانـي
الله واكبر لاضحك ضحكت اوجـان=وتبان غمـزة وجنتـه بالوجانـي
واليا مشى في مشيته عز سلطـان=هيبة ملك والوصف سيـد زمانـي
واليا جلس كنه وقف جذعه البـان=من طول جذعه واقـف(ن) بالمكانـي
واليا تكلـم كلمتـه وزن ميـزان=اسكت وامتع خاطـري بالمعانـي
ماخذ جمال الكون والوجه بستـان=يجهرك نوره من شعاع(ن) يبانـي
اذكره لاسلهم في عينـي بتحنـان=احيا واموت بنظرته فـي ثوانـي
العشق ماهو عيب والحب ياخـوان=ان ماسكن جوف الفتى صار اناني
واللي يناظر كل عاشـق بحقـران=قلبه حديـد وعلتـه شـي ثانـي
الحب عذري والمحبة لهـا شـان=ان كان صاحبها نظيـف العوانـي
لا واهني اللي على الوصل طربان=يضحك وروحـه دانيـه للغوانـي

هات الجروح وصبها بخاطري صب = لا تنتظر مادام جرحي يداويك
واليا نويت ابعدك واهجرك واهرب = من جرحك الاول على الثاني انخيك
هذي مقاسيم الذي فيك قد حب = مانعترض مادامها قسمتي فيك
يمك على سهل المقادير واصعب = بمشي انا عاشق لحضرة معاليك
اقلط على روحي ومن نبعي اشرب = واسكن خفوق اللي ملكته بياديك
بين المحاني سوّ ميدان والعب = داعب ضلوعي غن ّ أحلى اغانيك
واليا بردت احطب من ضلوعي الشبّ = واسهر على دقات قلبي بلياليك
يامهجتي ياغايتي وانت مكسب = ارضيك انا والله وشلون مارضيك
قلبي بيدينك وانت من روحي اقرب = اقرب من انفاسي واعيش بحراويك
منهو على عشقك يغني ويطرب = ابسألك بالله منهو يراعيك

فديت البسمه اللي ترسم الفتنه على الخدين =فديت الرمش والغره فديتك يانحيل العود
جمعت الشوق لعيونك ولعيونك انا تدرين=ابرخص لجلك الغالي فدى رمش العيون السود
يا أعذب من سكن فيني وأعذب مابهالثقلين = تعال ولا تخليني ضرير الشوف بالمقصود
تعال وعيش بعيوني تعال انزل هنا يازين = ابي شوفي يعيش احلى حكايات الوفا مشهود
ابي ترسم لنظراتي خطاوي تحمل الاثنين = وكف الوصل مابيني وبينك حبلها ممدود
جمعت الشوق من خافق على خدك نثرته لين = يفوح الورد بخدودك وعطّر للمسا عنقود
ضحكت وصار للضحكه بعينك باعث القلبين = بكيت ولا لقيت الا كفوفك تمسح المهدود
يطيب الهرج لعيونك واعيش الفرْح ليل وعين = بعد ماذاب فيني صوتك الفاتن وانا موجود
تعبت اجمع مساحاتك اتوه بفكرة ابدا وين = اشوف بهامتك دنيا كبيره مالها ايّ حدود
ابجمع خافقك فيني ابدّد فكرة الارضين = وفا واخلاص في دولة احاسيس الهوى وورود

ياللي تعيش بماضي الوقـت وشفيـك=عايـش علـى حلـم الشقـا والـزوالـي
ترسم معانـاة الهـوى بحلـم ماضيـك=وتعـيـش بالـواقـع بـصـورة خيـالـي
نظـرتـك للـعـالـم بـحــزن يـبـاريـك=اجبرت فيهـا الـروح حمـل الجبالـي
هون علـى نفسـك وخفـف مساعيـك=مـن نـاشـد المقفـيـن دربــه ظـلالـي
ياعابرلبحرالهـوى البـحـر مشقـيـك=وامـواج بحـرك لطمهـا فـوق عالـي
مرت سنيـن الدهـر والدهـر يسقيـك=مـر السنـيـن ودمــع عيـنـك مـوالـي
واللي رفع سبـع السمـا بعلـم هاديـك=رب الجلال اللي على الكـون والـي
مرسي الجبال وغافر الذنب معطيك=من رحمته في يوم عرض السؤالـي
ماينفـعـك ذكــره ولاهـــو بـيـداويـك=وشلـون بـه رجـوى امــل للمحـالـي
وافهـم تـرى دنيـاك كــاس تـواريـك=ماكـل مـا بالكـاس صـافـي وحـالـي
ماتـاقـف الدنـيـا بخيـبـة امــل فـيــك=وحلـو الامـل نلـقـاه لــو بـعـد مـالـي