وحشتني ياللي غيابك ذبحني = مشتاق اشوفك ياهوى البال مشتاق
هجرك ترى والبعد والله جرحني= وقتي بغيابك صعب ماصار ينطاق
القلب بغيابك حبيبي سألني =يـاالـلـي طــغــى ذوقــــك على كــــل الاذواق
في عينك اليسرى حنين (ن) اسرني= وفي عينك اليمني من العشق ترياق
تعال ماباقي كلامن ظمرني =كل الرجاوي سقتها مابقى باق

آمر تدلل ياحبيبي عليّه = لو تطلب اعيوني تراها هديّه
سمّ وتخير واطلب اللي في بالك =تراك والله منت عندي شويّه
لا يابعد حيّي ابد لا تفكّر = ايجيك منّي اي زعل او خطيّه

كل العذارى تبتسم لي وعييّت = الاّ انت مدري ليه هالقلب شاريك
الله حسيبك كيف في القلب شبّيت = نارك وانا قلبي رفض لايجافيك
طيرك على غصن الهوى يومك اهديت = احساس ماحسّه على غير طاريك

ياغاليه اهديت انا قلبك اكتاب = لك اول الصفحات عشقي وشوقي
في آخر الصفحات لك لوم و عتاب = لجل الغياب اللي ينشّف عروقي
اسأل عليك اليوم ياسر الاعجاب = وارسل عليك الشوق عذب الطروقي
افدى الدلع والغُنْج ياسيْد الاحباب = وافداك ياحلو الطَعَم والعذوقي

جمال العيد واحساسه ولونه= وعطر العيد والثوب الجديدي
وفرحة خاطري عمره وكونه =وطعم العيد والوقت السعيدي
وجودك فيه يا جنّة فتونه = يانور العيد يافرحة قصيدي
تعال وشوف مكتوب بعيونه = يقول انه عشانك جا يعيدي

يا مرهفه يا ناعمه مافيه مثلك صار حيّ= يادافيه ياللي ضوى بليلي خدودك نور ضي
ياكامله ذوق وحلى يا قمة احلامي انا = يا اخر امالي و الهامي واشواقي عليّ
والله ماشفت بعيوني مثل بعضك يالغلا=وشلون لو كلك بدى والله مامثلك وزيّ
انتي الفضا والزين من حولك كواكب سابحه = يا قمة اللا حدّ بحدود الجمال بكل شيّ
يامنبع الطهر وجمال الروح واسباب الرضى = ياللي هويتك حب عذري ماهويتك فيني غيّ

ياحسين خلي لو زعل ياحسين = ماهان خاطر عاشقي لا هان
ياحسين انا عايش على نارين = والله ماغيره ترى انسان
قل له ترى روحي فدى يا زين=وافدى العيون الواسعه يافلان
وشلون كل هذا زعل من وين = شايل علي بخاطرك زعلان
ارضيه بعيوني انا الثنتين = ماعاش منهو زعله ما كان

كفايه يانظر عيني كفايه =بلاش اتعيد لي نفس الحكايه
عشان اني احبك موت فيني = تبي تلوي ذراعي من البدايه
رجيتك لا تجرّحني رجيتك = خطاك انته ترى ماهو خطايه
انا عايش لجل ارضيك فيني = ولاهمك حبيبي في رضايه

لو شفت غيري يشتري لحظة رضاك = ابقى الوحيد اللي يجاوب سؤالك
من اولك لي آخرك قلبي قراك =واعرف وش اللي من يمين و شمالك
الله وكيلك ما ذبحني سواك = يا سارقن من موق عيني خيالك
بس المصيبه كان جرحك دواك = انته هناي وطيف غيري هنالك
ياحظ عين اللي سرقني هواك = وياقهر قلبي كان ماخذت بالك

يامساء الخير يالقلب الحنون = ياعزيز النفس ياطهر الوجود
نفسك العليا تباعدك الظنون= موقعك فوق الكواكب والحدود
يا كريم النفس نفسك ماتهون = ياعريب الجد يانسل الفهود
جامعن ذوق التعامل والفنون = والخجل صبغه في هرجك والردود
احترامك تفرضه بكل العيون = والذكا والطيب من طيبك يسود
ياعسى ربي على عمرك يصون = ياعسى فال السعاده لك يجود