يارب يامنزل تبارك وعمران = ياعالمً بالبينه والخفيه
يارافعً سبعً على غير عمدان = يامنجي أمن الحوت يونس نبيه
جيتك بهم ولا شكيته على أنسان = مشكي لغيرك يارقيب البريه
عشت الحياه أصناف واشكال والوان = واحلام عمري ليلةٍ سرمديه
رمش الليالي فوق الاحلام ذبلان = وجروح قلبي نارها نار حيه
يوم الخوي يترك خويه علشان = يبغى ظلال الزور والعنجهيه
يلحق سراب الريح والريح منهان = يبحث عن احلام الليال العتيه
يساق سوق شعيل واحلف بالايمان = ياما خطامه كان لعبة يديه
ياناس أنا عندي مقوله من الآن ؟ = الكل واجب شرط ينقى خويه
ان كان تبغى الحق في خير برهان = ترى زمان الجهل بالجاهليه
اكبر دليل اللي شرى بات خسران = خسران ؟ لا خسارته جوهريه
هذا الدليل يلوح في كل الاذهان = تمعنوا يا أهل القلوب العميه ؟
الى متى نبقى على قلب شفقان = الى متى نلبس ثياب الخطيه
الى متى نكتب على الدرب نسيان = الى متى نهوى شعار الاذيه
الى متى نشرب مرارات الازمان = ونجزا هل التقدير بلفين سيه
ياليت بعض اللي حصل ليت ماكان = ياكثر صرخات الدموع العصيه
ياكثر مافيني من أرواح واكفان = أرواح تحيا بس الاموات حيه
فكري مسافه بين حايل ونجران = ويلاه يابـُعـد المسافه علـيّه
كني غريبً يشتكي بـُـعـد الاوطان = والا وطن يبغى حياةٍ هنيه
ياما رميت الضيم في بحر الاكوان = وجازيت ظلم الناس باجمل هديه
كلي تسامح بالقناعه والاحسان = عايش بنيه ؟ والخلايق بنيه !!
مالي ياكود الشعر حيره وحرمان = بستر نجومً في سماها عريه
بستر ؟ ولكن كيف الاحجار مرجان = عكس الطريق الكل مختار غيه
الكل في وادي من الطيش غرقان = وياكثر وديان الحياه الشقيه
هذي خلاصه من تضاريس الالحان = وانا رصاص اللحن والبندقيه
موجه وموجه قايده كل الاحيان = نهار نخوه كلها حاتميه ؟
وهذا القصيد العذب في صوت الاشجان = حيث العروس بروحها النرجسيه
ضفيتها من هاجس الليل بلسان = جاب النوادر في حروف أبجديه
جبت المعاني لا زياده ونقصان = عل وعسى بلقى شداد المطيه
واختامها صلوا على نسل عدنان = اعداد وبلات الرعود القويه