سـمّوا مــعي باسم الكريم . الواحد الفرد العظيم=سامع دبيب النّمل وهو معتلي في اعلا سماه

هادي لــدينه من يشا . ومحسن لمن يمه مشا = ولا على عينه عَشا . يحيط بالكون ويراه

عبدالله انت ابني الكبير . شوفي ليا شفتك قرير = أعطيك من وحي الظمير . أفكار مافيها نياه

نجَحت بتجريب الزّمن . واليوم اباعلنها علن = تُهدى لمن مثلك فَطِن . يمكن تفيده في الحياه

الأوّله صل الفروض . مادام بك عرقٍ ينوض = لوقتها خلك حَفوظ . ياصلك ربي بالصلاه

والثانية للوالدين . عِش وانت مخفوظ الجبين=مهما تطول بك السنين . إحذر تكون من العصاه

اشفق على اللي كنّتك . واجعل رضاها ســنّتك =تـحت قدمها جنّتــك . إن كنت ترغب في النجاه

شالتك في شرقٍ وشام .وسهرت لاجل عينك تنام = لاتستمع فيها الكلام . ولاّ تغيرك الوشـــاه

وأبـــوك كم قاسى الدهَر . حتى انحنى منه الظهَر = والشيب في العارض ظَهر . أرجوك حقّق له رجاه

وِدّه يـــرى منك الوفا . وفي البرد تعطيه الدّفــا = إحــذر تعرّضه القفا . ويزيد مع كُبره شــقــاه

وخـــاوِ الرجال الطيبين . اللي لهم فـــعلٍ يبين= ودروبهم دايم يمين . تلقى لهم قدرٍ وجـــاه

ولاتعجبك بنت الرّدي .لوجت لــشوفتك تعــدي= قبل العلاقة تبتدي . خلّ الرّدي يبعد وراه

واوصيك رحّب بالضيوف .لو سيّروا يمك صفوف=ترى شحيحين الكفوف .مازادهم ربي غناه

وازكى صلاة على الرسول .اذا انتهى بي كل قول= بمحبّته ماني ملول .صلوا عليه أزكى صلاه