انتظرنا والسحابه مامطرت=دايماً برّاقها عنّا شمال
والمرابع من زمنها غبّرت=والحلال من الظماء صابه جفال
الحويّر جاع وامه ماصْرت=والوسيمه عودت تالي غفال
والديار اللي قريبٍ خضّرت=وانبتت ريضانها عقب المحال
علّها الوسمي عقب ما زهّرت=مرتينٍ لين عجّ القاع زال
والبحور اللي من الغرب هدْرت =لين صار الموج من فوق الجبال
وانجلت سود الليالي وادبرت= وطلعت شمس الضحى عقب الزوال
والسفينه بالمحاصيل عبرت=حمْلها غبرة وجيه وشين فال
عبرة لاهل العقول وفجّرت=صمت مرّت في تفاصيله ليال
نرجي الغيمه عساها لامطرت= نرتوي منها ويروى كل جال