مرّت بنا ايام وشهوروسنين = هي وردتي وانا سياجٍ حَماها
في عشّنا عن الهوى مستكنّين = لين المخيله جات تتبع هواها
قالوا:تولّم للسفربعديومين = وجات الاوامروالتذاكرحداها
وليل السفر ذكرت كل العناوين = وابدَت تفاصيلٍ تبيّن حلاها
وسريت اقبّل روس جهّال ممسين = واخلق للحظات الموادع هناها
مااحب اشوف الحزن بعيون غالين = اللي صوَرهم زايده فى بهاها
واصبحت اناظرشنطتي بيننابين = ماهمني وش جهّزوامحتواها
وصفّواواحاطوني من اشمال ويمين = بكلمات والدمعات فى منتهاها
وانااستعدّيت ودنت لحظة البين = واقول ياربي تساعد علاها
وحاراللسان وعبّرت نظرة العين = وغيوم نفسي ضاق منها فضاها
طِلعَتْ.." ف امان الله".. فى التوّ والحين = ومشيت .. لا.. ماقلت.. كلمه.. وراها
لكنهم عن كل الاسباب دارين = وتسامت الافكار فى مستواها
ماني من اللي عن ذرى المجد لاهين = امشي عدل والنفس مااتبع هواها
اراقب الله دوم واقوّم الدِّين = و مرضاة ربّي قبل شيٍّ سواها
وما دام لي ربٍّ على الشِّدّه يعين = عونات غيره شِمت عنها مااباها
واعَرْف كل الناس شاقين باقين = ويحمد صباحات الدجى من سَراها