اسال اللي لا طرق بابه يجيب=ربنا المعبود علام الغيوب
من رجا الله في حياته مايخيب=قابل التوبه وغفار الذنوب
واعذابي يوم صار الراس شيب=صرت انا شايب وعمري دوب دوب
من عذاب الوقت انا حالي صعيب=كن في قلبي لواهيب وشبوب
ماشكيت الوقت من فرقا حبيب=لا ولا من حب فتانه لعوب
غيرحال المسلمين اصبح غريب=مالنا هيبه معا باقي الشعوب
دمرونا الغرب عباد الصليب=بالثقافه قبل شنات الحروب
استبحنا وانتهكنا كل عيب=وافتخرنا ياحسافه بالعيوب
ننكرالمخلص ومنهو فيه طيب=ونعشق الخاين ونمدح في الكذوب
ياشبيب الوضع مؤسف ياشبيب=وضعنا ياخوك تصلاه اللهوب
نرجي الفزعات من عند الرقيب= الأله اللي له عباده تـنوب

مرحبا باللي من الواقع صويب=يشتكي كثر المهونه والخطوب
لأمة الإسلام والجرح العطيب=جرها التيار مع ذاري الهبوب
واصبحت من دون حظ ولانصيب=همها تكييف كيف ورقص روب
والشعرلازم على قصة فيليب=وشي منه القلب لوقلته يذوب
ميرصحصح يافطين ويالبييب=الفساداجتاحنا من كل صوب
صار مجد الذيب في وسط القليب=ولالنا مع مركب القمه ركوب
وإن شكينا عود الجاني طبيب=يكشف الحاله ويعطيها حبوب
لين حبل افكارها عنها يغيب=وتستدير بشمسها نحو الغروب
ضاق صدري يابوماجد يانجيب=جرعونا من دواهم كوب كوب
لو يطيب الحال من كثر النحيب=صار جرالصوت من باب الوجوب
ميرمابالصوت فيده ياصحيب=كود من يخطي عن ذنوبه يتوب
ونتقي رب ٍ على اعباده حسيب=ونطلبه يحي من الغفله قلوب
ونعقد الجمعه على الراي الصليب=ونترك المصحف عن احكانا ينوب
وبكذا نسترجع المجد الذهيب=ونبني اللي قدهدمنا طوب طوب