زيل الجبال ولا تزيـل الطبيعـه = وطبعي يشوم بعزتي وأنتخيبـه
أبـوي علمنـي أروم الطليعـه=وأنا على علمه وربعـي عتيبـه
الطيب ساسي والمكانه رفيعـه=وحنا عتيبه والمناسب عريبـه
حنا هْل الفزعات ماهي شفيعـه=وحنا لنا بالمجد والصيـت هيبـه
أهل المبادي والصدور الوسيعه=حوم الوغا ربعي عتيبه صعيبـه
صغيرنا بالطيب يْولِـد رضيعـه= وكبيرنا له حكمـةٍ تعتلـي بـه
على المعزه مارضينا الهزيعـه=وعلى المهونه ماقبلنـا الغليبـه
من حقي أفخر بالعلوم الوقيعـه=والشعر هاجس بالفخر فاح طيبه
ماتدري أني بنت حرن تطيعه ؟=ربعً ليا قاموا ؟ تقوم المصيبـه
من داس لي طرفٍ يامال القطيعه=ومن قال بي عذروب يقطع نصيبه
وأنا لي الله مارجيت التبيعه = راع الردى والكذب ربي حسيبه
هذا جوابي فوق رأس الرفيعـه=اللي على وضح النقا يقتديبه
وزيل الجبال ولا تزيل الطبيعه =وكلن على ساسه ينوّمس قريبه

يفدا حروفك يالهنوف المطيعه=من طق شعرك ياعسى الله يصيبه
يابنت ياللي للكرامة منيعه=يانسل قومٍ في المواقف مهيبه
عز وفخر يوم المواقف شنيعه=عتبان وان نادى المنادي نجيبه
نورك سطع مثل النجوم السطيعه=واللي يعذرب فيك واشق جيبه
وأنا معك وأفخر بشورك وأطيعه=واقف على جنبك بعزٍ وطيبه
لا تسمعين هروج ناسٍ وضيعه=ناسٍ مكاسبها نفاقٍ وخيبه
اللي يشيل الهرج مايستطيعه=مثل الذي ينبح بوسط الزريبه
لامنه شر ولا حصل به نفيعه=وهرجه تودي به وهرجه تجيبه
فعل الردى يااهل الردى مانطيعه=والطيب يبقى والمنايا قريبه
وختامها جاتك حروفٍ وديعه=أمانةٍ عندك ولا هي طليبه