أسقيتني غدراٍ حبسني بالأنفاس= ضاق المكان وظلّل الحزن داري

صمت السوالف ظامي ٍ حرفه إحساس= يبّست ريقه كلما جبت طاري

الجرح عمره ما ستر بعضه لباس= زاده يباسه والغدر فيه عاري

ذلّيت بك عزّ العباير والأجناس= وأهديتني ذلً سعى بإنكساري

كنت الهوى والعشق وأغلى من الماس= كنت البريق إللي يجدد نهاري

كنت السوالف لا روتني من الكاس= ذيك الليال إللي عشقها إنتظاري

بعدك دروبي تايهه تسكن الياس= عيّت ظروف الوقت تحيي مداري

هذي جروحك صاحبي كنها ساس= تبني صروح الغدر وتشبّ ناري

الله يسقي عشقنا دون مقياس= والحين موحش وحدتي وإندثاري

خذ ذكرياتٍ ما عطت غير الإفلاس= قدني تعودت الجروح ودماري