هزتني الذكرى ونومي جفا الموق =ونظمت لي عشرين بيت على ساق
سبايك فيها اثمن اللول مدقوق=ما تستساغ إلا لراقين الاذواق
بوح الخفوق اللي من شوق محروق =الشوق حراق وقسا البعد حراق
يازين مادام ان اللقاء شبه موثوق =والله لا اجيك ولو على قطع الاعناق
وماكل مطرود كما قيل ملحوق =كم فايت تنشف على أثره الأرياق
عاقل ولله الحمد ماني بمطفوق =لكن غرام وشوق وجنان عشاق
ويسوقني لك حسنك اليوسفي سوق =وغيرك بعيني من الغنادير ما لاق
حتى ولو قدامي وخلفي بروق =برقك بعني ما يضاهيه براق
بأجيك ابي حق واوفي لك احقوق =وموكل امري على خير خلاق
ودي نعيد اقلاعنا الاولي فوق =على بساط الذوق ونزور الآفاق
ياذوق يانبراس من يزعم الذوق =ياأحلا المذاق اللي من الصعب ينذاق
كم حسن منطوك زرع حسن منطوق=ومن حسن خلقك تقتبس حسن الاخلاق
يأكرم حبيب يجهل الغدر والبوق =يابو الحنان اللي كما النهر دفاق
لاشفت وجهك والشعر منه مفهوق =اشوف ليل تلبسه شمس الاشراق
ولاشفت نظرت عينك اللي بها توق =اشوف توق الحر الاشقر اذا تاق
اذا دخلت السوق ما للنساء سوق =يا أجمل ويا أغلى من تسوق بالاسواق
حبك بقلبي يسكن بكل معلوق =وينساق في جسمي مع الدم لا انساق
من الصعب لو ماشوفك ارتاح واروق =أعيش في ضيق وهواجيس وارهاق
وإذا الحبايب بالقاء تطفي الشوق =فأنا انظر بوجهك واحس اني اشتاق
ودي انام اجازة الصيف ما افوق =سفرك برى المملكه صعب ينطاق
والمختصر ياراقي الفكر والذوق =وضعي معك مايحتمل بعد وافراق)