ودي أنسى عذابي وأذكر أني جريح = كل ماجيت أبنسى طاولتني جروح
ياحبيبً عشقته كان تبغى الصحيح = أنت نبض المشاعر وأنت للشعر روح
كل عرقً بصدري لا ذكرتك يصيح = وكل همً بقلبي لا لقيتك يروح
ليه كل مارميتك بالقصايد تطيح = ليه كل مانسيتك قام طيفك يلوح
بين نفسي وبيني والكلام المليح = المشاعر فراشك بالزعل والمزوح
أنت ضيف المحاني والمعزب فليح = ياكرّم ضيوف قلبي حالفً ماتروح
لا تشك أبوفاي ولا تزعـّـزك ريح = أنت آمر تكلم وأكسر الصمت بوح
من عرفتك عرفت أنك صديق ونطيح = كثر مازعـّـلك وأزعل بس قلبي نصوح
ياكريم العطايا صار وصلك شحيح = كان مدك جزيل وكان جزرك شحوح
من فقدتك شعرت بغلطتي يامليح = لعنبوها خطايا والزمان اللحوح
كل ماجيت أبامشي درب هــيــن مريح = آه من جرحك اللي لا ذكرتك يفـوح
وكل ماقلت هانت من عــنـا الوقت أطيح = بين قلبً عطوف وبين نفسً شفوح
آه من كل معنى يرفضونه صريح= آه من وقت مابه للخطايا سموح
آه من كل دمعه من عيوني تطيح= وآه من كل صرخة بالخفايا تنوح
أثري الوقت مابه من يريد الصحيح = وأكثر الناس غامض مايحب الوضوح

من لوعة الايام . والهم . والبين = دارت حياتي وأخلفتني الليالي
ليه ثلاث سنين فوق أربع سنين = أشيل همي وأحتمل ماجرالي
والناس عني يافتى الجود غادين = من بسمتي قالوا من الهم خالي
والضيقه اللي لا أقبلت فالها شين = ماعاد صدري لا زبنتني شمالي