يا اللي إلى وصلها تاقت شراييني=تداركيني قبل ما تشيب عاطفتي
مديت لك بالوفا والشيمه إيديني=كنتي سعيده بلقيانا ومعرفتي
أنتي تدلين باحساسك عناوني=الله يا مكرمك بالفكر لا طفتي
ما فيه غيرك ملا يا الغاليه عيني=عن البنيات وسط انسانها نفتي
كم عاذلٍ رام يدخل بينك وبيني=وزدتي إصرار في حبي ولا خفتي
ما كان يغريك فيَّه فيك يغريني=عهدٍ قطعناه عن فحواه ما صفتي
احس صوتك على بعدك يناديني=نسمه على عادتك تهوى ملاطفتي
نمد حبل الوصال ونطوي البيني =يا ما على حالتي من طيبتك رفتي
البان مع شهرته بالرِي والليني =يغار من رقتك لامن تعطفتي
تمر الايام والساعات وسنيني=واهديتك العمر واكرمتيه وانصفتي
نظرة محياك بالدنيا تكفيني =يا اللي من الورد لاوجانك تقطفتي
تدرين حبك دخل ذرات تكويني =حمامه وفي رياض القلب رفرفتي
ما عاد به بنت في دنياي تغريني=جيتي بقلبٍ خلي وفيه شرفتي
انتي وحيدة حلا تزهين بالزيني=باجمل قصيده من احساسي توصفتي
كلمه وعن باقي الأوصاف تغنيني=ما اشفت احد يملك احساسك فهل شفتي؟