شبكة رهب الأدبية-ريما محمد السديري - ( تـكـفـى ) تعـرض لاول مـرة بالـفـيـديـو مع التحـيـة للجـمـيـع

تكفى ترى ماقلتها قبل هاليوم=من خلقتي ماقلت تكفى لرجال

ولا عمري أنخى من الشغاميم شغموم=حتى لو أنه حدني أشهب اللال

مانخى ولكن لا نخاني من القوم=له أنتخي لو حالتي حالها حال

أقوم والا علني يوم ماأقوم =أسوق له وجهي وكفي وماطال

واليوم شفني قلتها ماهي علوم=ناديت باعلى الصوت ياذرب الافعال

أقولها وأنا من الوقت مزحوم=للوقت ميله .. وللمواقيف رجال

ما قلتها ياكود ضايق ومظلوم؟=وانت السند يامعّرب الجد والخال

كنك (صلاح الدين) بمواجه الروم = لك هيبةٍ تكسر ثمانين خيّال

لك وقفةٍ يفخر بها كل زيزوم = ولك جاه يرقابك على نايف الجال

دامك من اللي باللقاء ينطح القوم=لا عِميت الابصار والحرب سّجال

من ساس وايل ملتجأ كل مضيوم=وقفاتهم عند العرب مضرب أمثال

اللابة اللي مجدها دايم الدوم = تاريخها تفخر به أجيال وأجيال

يوم الرجال أقوال وأفعال وسلوم = تاقف لاسم وايل صناديد وأبطال

ولاني بمن يشفق على السب واللوم=قضاب ميلة صاحبه كل مامال

والعبد ماصابه من الرب مقسوم=ولا تزعل القسمه طويلين الامال

تكفى ترى ماقلتها مثل هاليوم=من خلقتي ماقلت تكفى لرجال.

للشاعر / منصور الرويلي
.

.

أحد الردود الذي وصلني على قصيدة ( تكفى )

من الشاعر الاخ العزيز الشيخ ناصر مشعل الايداء
:

.
( قـــاف عــنــزة )
.

أبشر بعزك والخطاء يرخص السوم = ان كانها بالحال وان كان بالمال
ابشر بعزك لو تبي ننطح الروم ؟ = عاداتنا كسب الثناء اقفاي واقبال
ماتلحق المخطي أذا لامنا لوم = نميّـز أعقولن بها اخفاف واثقال
ياصاحبي محدن من الناس معصوم = كم بالبشر كاذب وكم فيه دجال
لا صرت واثق لا تناطح لك سهوم = كم شجرةٍ ترمى اذا ظلها مال
كثر الحسد والغلّ والشك والزوم = يدمر له اجيالٍ توارث لها اجيال
محدن سلم من هالبشر دايم الدوم =حتى النبي لحقوه بالقيل والقال
المجتمع ضايع وضاعت به قروم = رؤس العرب مافالها هالزمن فال
شوف المواطن حقه اليوم مهضوم = كل التعامل اصبح ريال بريال
ان طعتني لا تلتفت جيهت ارخوم = اللي يطق الظل يكفي به اظلال
حنا نعرف الحر ,, وانميّـز البوم = مقصودنا الجوهر ولا تهم الاشكال
بعض الخلايق تظلمه بصمة ابهوم = اللي تجمعها بطاقات الاحوال ؟
هذا الخطأ ماهو خطا زلة اختوم = من كان له حيله بذا الوقت يحتال
ياما تغاضينا ,, خطأ كل منجوم = وياما تجاهلنا سواليف جهال
لكن على الله يصلح الحال وتدوم = اتدوم (ياقاف عنزة) ميلة عقال
لاشك قدرك فوق رأسي ومحسوم = مقدار وافي مابها شك وآجدال
هذا كلامي جاك واضح ومرسوم = من خاطري واللي ورى القلب مازال .
للشاعر / ناصر المشعل
.

[/center]