من علمك ياورد تقسى على الماي=من علم زهورك تخون السحابة
كنت احسبك تشفي لي جروح دنياي=أثرك غديت هموم قلبي وعذابه
ماحسبت للورد ناكر ونساي=ينسى السحاب اللي سكر من شرابه
يا ورد عمر الغدر ماهز مبداي=دربي سما وحروف شعري ربابه
أضحك وأخفف عن عذوليني أبكاي=والقلب ينزف بس محدن درى به
جيتك تسابق روحي وقلبي خطاي=ورجعت تالي الدرب كومة كآبه
مديت لك في شدة الضيم يمناي=يمنى تربيت بين عز ومهابه
وأخترت في عينك سجني ومنفاي=وأبدعت فيهم وجد شعر وصبابه
ظنيت ترسم درب الاحلام وياي=ظنيت عمري الجاي فرح ورحابه
هو بقى ياصاحبي للعمر جاي=بعدك رحل كل الفرح مع شبابه
أخطيت يا ورد والانسان خطاي=وقلبي تعلم من خطأ صك بابه

حل النبأ وأستسمح الحرف لرضاي=وده على بيض الصحايف كتابه
وده يبين نغمة الحزن للناي=ويعلمه معنى الحزن لو شقى به
خط وعلى ظلم المحبين وأعداي=جاله مجاله وأبتدى به جوابه
من غيره اللي جيت عاني من أقصاي=لاحل حرفه ياهلا مرحبا به
أشفق على الموعد ولو طال ممشاي=وأتعب وكلي له أمل وأستجابه
لو بشتكي محدن تسمع لمشكاي=من يشتكي والياس أصبح زهابه
اللي تعلا يوم يبحث عن أرضاي=اليوم حالي ما درى وش جرى به
دامه سمع واشي مع قول حكاي=معه أختلف ميزانه اللي قضى به
مايدري أنه سلوة الروح ومناي=وانه علي أخطى وطول غيابه
لو يأخذ الدعوى من شفاه لشفاي=عل وعسى ينزاح همه ومابه