ياهاجسي حضّر وحسوتك المعاني والطروق=عان السحابة خيّلت يجذبك لمع بروقها

في عبلةٍ فيها الخزامى والنفل شوفه يشوق=والمزنه الغرّا على العبلة تهل حقوقها

يا ماحلا في مدلهم الليل لمعات البروق=في خايعٍ ما داج به غير البدو مع نوقها

ويا ماحلا سج القدم بين الفيافي والعروق=وياماحلا طلّة جبين الشمس وقت شروقها

وأنا ادري ان صيد النوادر عن جنابك ما يعوق=دايم حرار الصيد يالهاجس تفك سبوقها

خابرك لامنك بيدت البدع بالنيّه صدوق=تسوقك الشيمة لقول الحق وانت تسوقها

وأعرفك لامنك بديت ولا لقيت اللي يلوق=تشوم عن جلب الهزال ولا تجي في سوقها

وأنا لك الله واثقٍ بك وانت لك حق الوثوق=لكن خذ علوم الوفاء واحرص على موثوقها

وخلّك على قول العلوم الغانمة دايم سبوق=ترى الرجال اليوم تعرف من حسن منطوقها

بعض العلوم اللي تنومس ترفع الرجّال فوق=وبعض العلوم البايهة سقم الرجال وعوقها

وخلّك على خبري بحرفك ياعميل الخير ذوق=واحرص وراع اذواق خلق الله وراع فروقها

وادري تغثّك هالخبول اللي يلوون الشدوق=ناسٍ غثاها طال لكن من يسد حلوقها

من كثرهم صاب القصايد واكثر الساحة فتوق=خريمةً فتقت على الله من يخيط فتوقها

أما انا وانته على عهد الجزالة مانبوق=نقطف ثمر عذب المعاني من جزال عذوقها

ناخذ حقوق ونعطي أهل العرف والشيمة حقوق=ولا نلد العين في ناسٍ تلوّي شدوقها

وان قلت لي ما انته برايق ؟ من ورى خشمك تروق=كله لعين الجادل اللي تنتظر معشوقها

المهرة اللي تسكن بقلبي وفي كل ( ا ) معلوق=وانا ادري ان حبي سرى في دمها وعروقها

أنا اشهد أني لشوفها دايم وخفّاقي شفوق=اللي جمميع اوصاف ترفات البني تفوقها

في كل ليل يلوفني شوقي لشوفتها واتوق=لشوف غرّتها ليا قامت تلااعب طوقها

اللي غلاها في الحشى ما عالمٍ عنه مخلوق=حقٍ لها عندي ولو تاكل حشاي حروقها

ما ارضى اعرّضها لسان اللي على الشينة لحوق=اللي يلم علوم خلق الله ويردم فوقها

ألي عليها ما يجي في حبها العذري عقوق=والها علي اسرارها ما ينفتح صندوقها

والله ما أرجي من وراها لا صبوح ولا غبوق=أمشي على وضح النقا واعطي الرجال حقوقها

ماني لغرّات العرب واعراض خلق الله سروق=ما أخبث من اللي ينتمي لأهل الوفاء ويبوقها

وياهاجسي صدّر وحسوتك المعاني والطروق=عان السحابة خيّلت يذبحك لمع بروقها

وسلامتكم جميعاً