ياخوي لاتحسبنه داله(ن) بالي‏=والله ماذكر ولا ليله سلا فيها
ماغير اهوجس وارد اللوم في حالي=واضحك النفس في لحظه وابكيها
أعاتب النفس في حلي وترحالي=واجامل الناس وفروضي اصليها
واسرح مع الهم مشي ومر زرفالي=قد طوعتنا الليالي بين أياديها
امشي على شورها واصيح ولا لي=والناس ماضاعت إلامن هقاويها
ضاع اول العمر في هم(ن)وغربالي=مير اطلب الله يستر في تواليها
اللي برك للحمول لزوم يشتالي=وانا حمولي عجزت اليوم لا اقويها
سبتك ياللي تتل القلب من تالي=تلة حبال المحاله من سوانيها
تلعب بعقلي وانا غرقان بهبالي=وتغيب عني بدون اسباب تبديها
الناس واجد تمر الوان واشكالي=لكن قلب العنا دايم يحاتيها
عجزت لأنساه وامسح شكله قبالي=وفي صفحات ارشيف صدري صرت مخفيها
عامين ياناس لا كلم ولا جالي=ماغير نسمع مع الناس طاريها
يانور عيني تبصر وانظر ابحالي=وارفق بحال(ن)عليك الهم طاويها
وتم المواصيل واترك عنك غربالي=والا ابتعد عن حياتي لا تعنيها
وش فايدتنا من الأقفى والأقبالي=مدام منك الجروح ولا تداويها
ياعين هلي دموعك وسم همالي=وسمية(ن)في محامة نجد تسقيها
ثم اغسلي اهموم قلبي اول وتالي=وخليني ادله عن القصه وراعيها