ياعلي قرّب لي المفتاح لا تشره عليّه=يارفيقي ضايقٍ صدري من الناس وغثاها

شايلٍ همٍ على صدري كبر هضبة طميّه=هشّم ضلوعٍ دهاها من زمنها مادهاها

ويش صاب القلب ؟ ما ادري صدمته صدمه قويه=ونفسي اللي صنتها عن كل زلّه ويش جاها

لاتنشّد عن علومي خلّها تكفى خفيّه=دوك عيني لو تزيد الأسئلة جادت بماها

ماهقيت ان القلوب السود من ذنبي بريّه=ولاخبرت ان القلوب البيض تطعن في قفاها

ولاخبرت ان الكبود تفوح فوح الشاذليه=ولاخبرت ان الكرامة جرحها يلعن ثواها

ولاخبرت ان المحبة بلسمٍ من سم حيّه=ولاخبرت ان المشاعر موتها يجبر عزاها

ولاخبرت ان الخزامى نبتة ارضٍ جرهديه=ولاخبرت ان النجوم تضيق حتى في سماها

ولاخبرت ان النوايا نيّةٍ تغدر بنيّه=ولاخبرت ان الفعايل ماتطاوع من نواها

ولاخبرت الراعي امره صار في يدين الرعيّه=ولاخبرت الرجل لامن قال كلمة ماحماها

ولاخبرت ان النفوس اللي على زعمي وفيّه=لأجل شيٍ من توافه هالزمن باعت وفاها

ولاخبرت ان الخوي يضيق صدره من خويّه=ولاخبرت ان الأوادم حقدها يسبق خطاها

لين شفت الناس تالي الوقت ياخوك مخليّه=من شفاحتها بدون شعور ترثع في عشاها

كنها عن مايعز النفس ياخوي محديّه=يوم شفت بعين قلبي طيبها يتبع رداها

كنت احسب ان السنين بمدها دايم سخيّه=كنت احسب ان الليالي ماتقصّر في عطاها

كنت احسب ان المشاعر من قسى الوقت محميّه=كنت احسب ان الكرامة ما احدٍ ياطا حماها

كنت احسب ان الرجال تشوم عن درب الرديّه=كنت احسب ان النشاما مايخيب اللي نصاها

خل كل علوم قلبي داخل الروح مغطيه=لاتجي من دون ماتستر ولا تبحث خفاها

عادتي ما اشكي ياكود لجاه خلاّق البريه=عانني لاضقت اردد سورة الشمس وضحاها

ياعلي ياخوك تكفى بس لاتضغط عليّه=دوك عيني لو تزيد الأسئلة جادت بماها