لا حول لا قوه ولا حرف وكتاب = لا حلم لا هقوه ولا ناس غالين
لا ذوق لا معنى ولا عشق واحباب = يستاهل اللي فات والحاضر الشين
الله كريم وكل موقف له أسباب = الخير وآجد .. والنشاما كثيرين
قبلك أنا عانيت من ظلم الاصحاب = الدمع فاض وغاض دم الشرايين
أغلاهم اللي في عيوني ولا غاب = يوم أنها ضاقت بي الخطوه سنين
ماجيتهم شاري ولا جيت جلاب = يقطع كفوفً مابها للعسر لين
مأبي لاحد منــّه ولابي لاحد ناب = لعيونهم كان النشاما عزيزين
جيت الحبيب اللي يبي عطر الاحباب = أبي الغلا والملح والظل والزين
وجيت الغريب اللي طوى عهد الاغراب = وجيت القريب اللي ربوعه حشيمين
بعض الخواطر وان حسبنا لها حساب = نفرش لها الواجب وظل القوانين
بين البحر والبر والريح والباب = مابه أمان يحطم اليأس والبين
العين تنخاني على طرد الاسباب = والقلب ضايق والمواجع براكين
يوم أتذكر وش كثر خاطري طاب = يوم أتهجا وش تقول العناوين ؟
كل الوجيه الوافيه صارت أجناب = عجزت أفــّرق بينهم حد الاثنين
هذا أنا مابين صادق وكذاب = تعبت أعاني غربة الخاطر الزيـْن
لو تدعي وأنا أدعي غدر الاصحاب = مابه دليل ولا عليهم براهين