سلطان راح ولا بقى الا اسم سلطان=إسمٍ على روس المراقيب سامي
إسمٍ بقى في صفحة المجد عنوان=مايجحد التاريخ بعض الاسامي
سلطان كتلت ناس في داخل إنسان=دوله تعامله الدول باحترامي
في يوم دفنه بان للناس برهان=الطايرات اتقول سرب الحمامي
صبح الثلوث ألين وقت العصر حان=وصدر المطار من ام جنحان حامي
لين ازدحم مسجد طليقين الايمان=وادّو صلاة العصر خلف الامامي
واقبل يشيلون على روس الامتان=في منظرٍ ماينوصف بالكلامي
اقبل به النايف ووداه سلمان=وعياله اعظامه ونعم العظامي
وخادم بيوت الله يشوفه بالاعيان=نظرة موادع فالملاقا الختامي
واخوانه الباقين واعيال الاخوان=فوجيههم حزنٍ من السبت زامي
وشعب السعوديه تصاليه الاحزان=وانا اشهد انه ياعرب مايلامي
سلطان سلطان السعد بحر الاحسان=موجه على وجه الغرابيل طامي
مدة يمينه صافحة كل الاوطان=ونقشه على اخدود الاراضي وشامي
إمدلّه آرامل وكفّال يتمان=يسمع شكا الشاكين له باهتمامي
يفزع ليا جابوا له اوراق مرضان=ويتابعه حتى يقوم ابسلامي
ينهي بمده فاقرة كل فقران=كريم تعطي من عطاه الكرامي
ماله.. إلفعل الخير خيلٍ بلا اعنان=وامجودٍ راس الدفاع ابخطامي
مسس كيان الجيش من هاك الازمان=أميرٍ يضيم العدا مايضامي
إليا التقى في موقع الحرب جمعان=يضرب برايٍ مثل حد الحسامي
ذروة سنام المجد في حرب وآمان=يبرك له المجد المسما اشمامي
شعبٍ على فرقى المعازيب فرحان=وشعبٍ بعد سلطان عاف المنامي
عسى له ابجنتك يارب مسكان=ويهنى تحت ظلك نهار القيامي