رقمٍ يناديني على جوالي=وأنا بقمة حوستي واشغالي

رقمٍ ما اعرفه لا ولا ادري منهو=وحسّيت في صوت المعنى عالي

وساعة ضغطت الزر الأخضر جاني=صوتٍ شغل فكري وغيّر حالي

يقول لي كيفك وكيف أحوالك؟=بالله قل لي كيف حال الغالي !

قلت أنت من ياللي تنشّد عني=من قبل لا ابديلك جميع أحوالي

قال المعذب من غلاك وحبك=ياللي عن قليب المعذب سالي

ماتدري أنه قد ضناني شوقي=ولافيه يوم الا تجي في بالي

دايم اهوجس بك واخطط وارسم=وأبني على قربك جميع آمالي

من كثر ما احبك واهيم بحبك=أشم حتى نفحتك في شالي

وأردد أسمك كل يوم وليله=حتى كتبت اسمك على سلسالي

قام يتكلم عن غرامه فيّه=وانا معه بشوف ويش التالي

وساعة خلص من هرجته بادرته=قلت استمع لي جعل مالك والي

أنته وش اللي جاب رقمي عندك؟=ووشلون تعرفني وانا بلحالي؟

معرض عن أهل الحب ماني منهم=لوكان جسمي من عناهم بالي

لكن تردعني مخافة ربي=ثم سلم ابوي وطيب عم وخالي

وأخشى على نفسي تزل وتهلك=في حب مصلحجي أو استغلالي

واخاف اشوّه سمعتي وأعميها=وأنا على روس القمم منزالي

لأني من ارجالٍ تقول وتفعل=والهم محلٍ في المكارم عالي

أنا سليل أهل الوفاء والشيمه=من طيب ماضيهم تطيب أفعالي

ألهم علي أحرص على سمعتهم=وأصونهم في اقفايتي واقبالي

قبيلتي وافخر بأني منها=هي مسندي هي محزمي وظلالي

أنا بدوي يابنت ما أرخص نفسي=وبين الرجال اهل الكرم مدهالي

ما اعرف ياكود أكرم واشبب ضيفي=وأسوق له كرامته من مالي

وان كان ضيفي للردى يجذبني=أشوم عن دربه تراه اشوالي

واللي بداره ما يوجّب قدري=أشد عن داره واسوق رحالي

وان جاتني زلّة رفيق ادمحها=وأغفر له الزله لأنه غالي

وإذا نخاني غاليٍ لبيته=ورميت لأجله غترتي وعقالي

ووقفت وقفة صاملٍ ما اثنيها=وأرخصت لأجله مهجتي وريالي

واللي أعزه أشركه في اللي لي=ما اقول ذا لك يالرفيق وذا لي

ولا احط نفسي في المكان الطامن=وأعرف لمخراجي قبل مدخالي

قطع كلامي له وقال اسمعني=أما انت رجعي او بعد متعالي

وان جاء ببالك يوم بتكلمني؟=أسمي عرفته وتعرف جوالي

لكن لا تطري علومك هذي=وأن كان ذا علمك فلا تسعالي

سكّر وانا سكّرت خطي دونه=لكن سلبني خافقي طوّالي

انا أحسبني شاربٍ فنجاله=وأثره هو اللي شاربٍ فنجالي

وانت سالم وغانم
صحيت كلك
لاهنت ولاعدمناك
دام نبضك
سلامي