|
احتاج قهوتي فقط
القهوة العربية لها فنون بالطبخ منهم يشربها على الريحة يعني خفيفة جدااا ... ومنهم من يشربها شقراء خالصة ومنهم من يشربها سوداء خالصة .. وشمر وعنزه الشمال ... يخمرونها سنه .... مابي اسرد الأشعار والقصص فيها كتبت موضوع خاص فيها قبل 10 سنوات في احد المنتديات .. اما قهوتي لها طقوس خاصة فيني اذا صحت التسمية .... احن عليها ودوم معي في الدوام اجيبها من البيت ... والدوام قهوتهم موجوده تحت الطلب جاهزة ... بس ما استصيغها .. مع العلم تعمل على اصولها ... قهوتي ......... طريقة قهوتي ....... معكم ورقة وقلم طيب اكتبوا كيف اعمل القهوة حقتي .. 1- ابريق 2- قهوة .... قهوة شقراء غامقه .... وقهوة سوداء ماركة dunkin donuts _original blend > 3- هيل هندي درجة اولى 4- زعفران 5- كوفي ميت دايت طبعا القهوة النيباريه درجة اولى دائما اجيبها من صديق لي العامري من اهل الطائف الطريقة .. الإبريق ضع فيه 6 كأس من الماء حتى يغلي ... واطحن ثلاث فناجين قهوة مع اضافة معلقة هيل ومعلقة صغيرة زعفران طبعا اصلي مع اضافة نصف معلقة كبيرة من القهوة السوده .. طبعا هذي قهوة الصيف اما الشتاء تختلف اضع فيها المسمار وغيرها من الإبهارات .... خلونا على قهوة الصيف المهم اطحن الجميع بس اجعلوها خشنة .. طبعا بتخسركم الخشنة عن الناعمة .. المهم لما تجد الماء يغلي خفف النار كي تضع الخلطه العجيبه اللي تجيب الراس ماهو لعب ...ولاسكر غطاء الإبريق حتى تشوف القهوة بدأت تغلي سكر الغطاء بس فتحة المصب مفتوحة او لاسكر الغطاء بالكامل ... المهم اترك القهوة على النار ثلث ساعة تقريبا ... بس نار هادئه .. وبعد الثلث اللي يبي يخفف القهوة ويبيها تفتح يضع معلقة كبيرة ممسوحة من الكوفي ميت الدايت طبعا ... ويترك القهو بين 5 -10 دقائق ... اللي يبي يحط القهوة بالبراد .. قبل ان يضع القهوة يطحن معلقة صغيرة متروسة من الهيل ثم يضعها في البراد ثم يزل يزل القهوة في البراد فوق الهيل ... ويتركها ثلث الى نصف ساعة او اكثر ... اما الدلة اذا استخدمت تترك على النار قليل بس انا احذركم ... اللي يشرب القهوة على طريقتي يكره جميع الطرق بس بشرط تعملها كما قلت لك جربوها مانتم خاسرين ... وعلمتكم الطريقة السرية لقهوتي الغالية |
الواضح مرحبا بك وبرائحة قهوتك ولو كنت بعيدا
مازلنا بمذاق تلك العصيده بالرطب والان هاهي سيدة الكيف تحل بطائرة النكهات الخاصه لااخفيك اجيد الطبخ وبمهارات فائقه لاكن لاامارسها الا بالطلعات والكشتات البريه الواضح اذا كان هناك المزيد فعجل به قبل رمضان اخشى ما اخشى ان ارى الموضوع وانا صائم والله يعين...فرائحة ماتكتب تملاء المكان |
الواضح
انا كيفت على طريقتها كيف لو اشربها :thumb: كاني اشم ريحة القهوه وانا اقرا :d ماشالله عليك يالواضح الظلماوي :d دغيم الظلماوي <<< من شمر ومشهور بتصليح القهوه ويلقب راعي الوالمه يعطيك العافيه يالواضح رح نجربها برمضان بس نخاف ماننام وتسبب علينا ونضرب المدفع :d تدري بالعيد اجل ;) تحياتي,, |
اخوي .. الواضح
وين البيت فيه ؟ الله لايهينك ودي اشرب القهوة معك قمت اتعومس ولا صرت اعرف اكتب الرد زين من حلاوة طريقتك في عمل القهوة . لكن ودي اشير عليك وهو انك تختار القهوة البرية تراها طيبة جداً وشكلها فيها حبات سود وليست كثيرة . او عن طريق حاسة الشم بتفرق بين الطيب والمتوسط . مودتي |
اقتباس:
صدق عاد اخي العزيز خلف العاطفي .... اذا جوني الضيوف اضع ثلاث دلال ... او برادات وكل وحده لها مذاقها اراعي الشمال والجنوب والوسط ... اهم شيئ الضيف يكيف ويرتاح هذي الغاية ......... اما قهوتي لها ناسها ... يعني تبيني اعجل ترى احوس فيكم ... تقديري ايها العزيز |
اقتباس:
تبي الصدق ريحتها ماتقدر تقاومها ... والظلماوي ماهو بعيد عنا احنا اهل طيئ وجدنا الأوس بن حارثه اللامي .. بس لاتشربها آخر الليل ترى ماني مسؤل اذا مانمت ياهلا ومرحبا فيك يالغالي |
اقتباس:
ابركها سساعة تحل ضيف عندي ياهلا ومسهلة ... بنحطك بعيونا يالغالي انا شغلي في القهوة البرية اليمنية بس الآن مغشوشه وحبتها معروفة ماهي وحده وتتميز بصغر حجمها وتحتاج الى رعاية خاصة في الحمس فاذا وجدت الأصلية كانت هي قهوتي المفضلة والخولانية معرف طعمها مايحتاج ... اما الآن كل شغلي بالهررية الإثيوبية ... بس جرب طريقتي .... بعد ماتفضل عندي يهلا فيك والله |
انا من عشااااق
القهووووه واذا شميت ريحتها وانا نايمه يطير النوم مني وقهوتي بريه ومحموسه بشنه وابهر القهوه بهيل ومسمار وكوفي ميت والاكيد زعفران بس تدري اخوي الواضح لكل قبيله طريقه معينه فيه ناس يحطون معها دارسين واتوقع اهل الجنوب اذ ماخاب ظني بس شكل قهوتك انت غير <<<<<<<<<<<<< ناويه تقلط عند زوجتك اتقهوى عندها :) تحياتي لك |
اقتباس:
ياهلا فيك والله ...... ضيفة معززة ومكرمة طبعا الشنه والمسار اضعهم بالشتاء ..... وقهوة الدواسر منعوته مايحتاج وكل قبيله لها مذاقها الخاص فيها .. بس جربي طريقة قهوتي ولكن لاتنسين ماركة القهوة السوده .. السر يكون فيها شيء غير طبيعي تقديري |
| الساعة الآن 11:11AM |
Powered by vBulletin® Copyright ©2000 - 2024, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية