دام الكرامه للرُجل شأنها شان = مع السلامه واحفظ أسرار ماضيك
الحمدلله شامخ الـراس ماهان = ولا عاش راسٍ ينحني لجل يرضيك
أنا على مبداي والطيب عنوان = لا غيرّت سود الليالي مباديك
لي بالوفا منهج وسيره وبرهان = على الفخر كم صافحت كف مغليك
قمة شموخي تعتلي راس مابان = ولي هقوةٍ تخلف بقايا هقاويك
لا صارت حروف التجافي لك لسان= أصد عن نظرة غرامك وطاريك
في ساحة الابداع .. فارس وميدان = وفي موطن الاحساس ذكرى معانيك
لا تحسبني ضايق الصدر بلشان= من لهفة الاشواق ذكرى لياليك
سنين حبك بين لوعة وهجران = الموت أرحم من قساوة تجافيك
في بحر حبك بين غربه وحرمان = أموت ضامي ولا مذلة ترجيك
جيتك وأنا ضايق وهايم وعطشان = وأقفيت ضامي في متاهة صحاريك
أجيك كلي شوق والقلب ولهان = وأضيع في ساحل جفاك وتماديك
ماكل زودٍ بين الاحباب نقصان = ولاكل قلبٍ بالمهونه يناجيك
واليوم لو أني من الشوق حيران = أشرب من الاوهام ماقول ضاميك
كتبت لي مضمون حبك والاشجان = صوّرت لي معنى الوفا في قوافيك
غرك زمانك بين عاذل وخوان = أشعلت جمر الصد بأحساس غاليك
خلك بفالك وأبتعد قدر الامكان = طعنة خفوقي عنها الايام تنبيك
أنا حروفي كنها الوسم .. هتان = غيمة فكر تسقي مساحة أراضيك
لو دمع عيني سابحٍ فوق الاوجان = موتي يهون ولا متاهة طواريك
ماتدري أن الوصل والصد شتان = والبعد جرحه بين الاضلاع يبكيك
ياما كتبتك للغلا .. نبض والحان = وغنيت شوقي في رجاوي أمانيك
أهديتك حروفي على كل الالوان= أصدق شعوري في عذابك يواسيك
أرسم لك أحساسي محبه وتحنان = من هيبة حروفي تهابك معاديك
وأنا عزايه شامخ الراس مانهان = أرفع نظر عيني مهابه ولا أجيك