الروح هامت في حسين الوصايف=هامت وأنا المفتون ياسيدالغيد
يانايف ٍ بالحسن عن كل نايف=سيد الجمال تصير لاسيادهم سيد
مالي بجميع الناس للكل عايف=حبك أسرني وعشت سجنه بلا قيد
ورسمت لك بين الضلوع النحايف= صورة خياليه ومن دون تحديد
القلب شافك شي واليوم شايف=بالعين غير اللي توقعت ويزيد
طغى على كل البني الرهايف=الله عطاه من الحلا دون تمجيد
العين عين الريم والرمش راايف=على خدود ٍ تزهر بشوفها البيد
والمبسم اللي ارتسم بالشفايف=سنه ضحوك يشتت الهم ويبيد
وشلال شعره لانتثر للردايف=وليامشى يختال وفي زينه يكيد
ياتاج راس الزين والغير زايف=ياللي جماله انفرد فيه تفريـد
مثل البحر والغير عايم وطايف=مافي مثلك زين يا ناعم الجيد
خلك إقبالي لاتجيني الحسايف= والله ما بي غير شوفك ولا أريد
أنسى سموم القيظ كني بمصايف=ليا شفت زولك ينقلب همي لعيد
خطيت فيك ابيات بالشعر خايف=اتوه في حسنك وعن وجهتي احيد
ومهما كتبت وقلت مابه كلايف=لو كل عمري اوصفك لازم ازيد
ولا فيه غيرك ياوليفـي ولايـف=وحيد في قلبي وأنا بقلبك وحيد
الروح هامت في حسين الوصايف=هامت وأنا المفتون ياسيدالغيد