أبعد من نجوم السما واقرب من ظلالي= واضعف من اوراق الشجر واقوى من عزومي
وارقّ من ورد الهوى واقسى من حبالي= واصدق من شعور النقي واكذب من غيومي
واكبر من جبال الهدى واصغر من عقالي=واعمق من اعماق البحر واوضح من سلومي
وامرّ من فرقا الغلا واحلى من الحالي=واكثر من ايام العمر واقلّ من يومي
وأحدث من احدث مُخترَع واقدم من البالي=وادنى من الدنيا عليْ واعلى من نجومي
واحرّ من نار الهوى وابرد من الخالي= واغلا من اموال الثري وارخص من هدومي
واصعب من اللي روّحوا واسهل من التالي=وامتن من جنوب الخوي واهون من وجومي
وابطأ من افعال العرب واسرع من الرّالي=واثقل من حمول الزّرى واخفّ من لومي
واذكى من اذكى الاذكيا واغبى من السالي=واقصر من اوقات الهنا واطول من همومي
واجمل من عيون الظبي واسوأ من أهوالي= وابيض من بْياض اللبن واسود من غمومي
واضيق من احوال الشقي وارحب من امالي=واذلّ من ذُلّ العدى واعزّ من قومي
هاذي وصايف خلّي وروحي هوى بالي= وهاذي الحكايه كلّ بوها وهاذي علومي

دق الجرس للحصه وقام الجمل= يشيل معه اقلامه وكراسته
رايح على فصله ويحدوه الأمل=يلقى نتيجه صح من حماسته
امّا يطيح بطالب ونعم وأهل =للعلم ويقدّر عسله وكاسته
ولا يطيح بطالب يقشّر بصل= ودفاتره عاله على دبّاسته
ومن لاقرصه النحل ماذاق العسل=ولاينفعه كرسيّه ولا ماسته
والعلم نورٍ يعمي عيون الجهل=والجاهل اللي يتبّع وناسته
ومن لا احتزم بالعلم فالدنيا خبل=ومن لايدوس الجاهلّيه داسته
ولنّ المعلّم شي اساسي ما غفل=دوره هل العلم الصحيح وساسته
قد خصصوا له يوم في كل الدول= يذكّرون اللي نسوا قداسته
واليوم يومك يامعلّم يابطل=يامن ربط تدريسه بدراسته
وهو عمل لكن مهو بية عمل=رسالةٍ للي معه فراسته
يبني من عيال الوطن سور وجبل=تقدر على شيل الوطن وحراسته
وجنود للدين الحنيف اللي كفل=نصرة رجالٍ تنصره لرياسته
و(نعم نعم للجد لالا للكسل)= مبدا المعلّم دايماً وسياسته
صحيح ما شال الحمول الا الجمل= والله يعزّ اقلامه وكرّاسته