خلاص قفلت قلبي يا عسى وارتاح=من بعد ما صارت الابواب مقفوله
تصّدى المشاعر وما يقلب بها مفتاح=لا تصدق اليّ يقلك سهل محلوله
من بعد وجه المرايا للاسف قد طاح=مات الكلام في لساني قبل ما قوله
واليّ رحل ما يخبرنا علامه راح=وحده شرد مثل ظبي(ن) قال فكّو.. له
واليوم طيفه غــَـرَب من بعدها ما لاح=بعد اختفى في قضية عشق مجهوله
صعبه تلاقي جروحك شمّها قد فاح=صعب الاحاسيس تبقى فيك مشلوله
ووخزة الشوك غير ما طعنة الارماح=مثلي قبض جمر في كفين مغلوله
يا صاح لولا الحيا مثلي انا قد صاح=صيحه بها الجن يصعق لو مرق حوله
مكسور طيري واحسه بالوجع قد ناح=ينزف جريح والدما بالريش مبلوله
يا ما على الغصن من جور الندى قد باح=ما يطربه غير كلمة موت هاتو .. له
يا ساجي الطرف كم رمشك غدا ذبّاح=يرقص كما الذيب فوق اشلأ مقتوله
ياليت واقدر ازيّف للالم افراح=واذوّب العشق في اضلاع معلوله
واصبّ له من سراب الحاميه اقداح=واعصر جسد غيم واجهض كل محموله
ياليت واسمي على صقر السما جرّاح=والعشق غفوه غفيناها بقيلوله
صعب الفراق يوم يبقى دونما ايضاح=صعب ان قلبك تقله خلّص الجوله
صعب الامل يوم ما تكسر به الاجناح=والكون يبقى بلا اقمار من حوله
صعب الورود من حدايقها تجي تنزاح=صعب الحبيب لو حبيب ثاني يحطو .. له
ضيّ الشموس في جبال اقطابها قد ساح=وانا حياتي وموتي ما حسبتو .. له
ان كان احساس قلبك قد نضب او شاح=احفرني اعمق وحبل الوصل مدوّ .. له
ذكراك تبقى وذكرانا مع الارياح=قدرت تنسى وانا النسيان ما اطوله
شق الحشا لو تبي في داخلي واجتاح=بمّواج بحرك وحطمّ في هواك دوله
واصنع من الموت شاطي رمله الاملاح=وادعج صخورك كما الاسياف مصقوله