معوّض خير ياحيٍ تهقوى في الزمـان ومـال =سنينك لو رقيـت بعدلهـا يطرحـك مايلهـا
تعلّم وإعرف إن الدرب قدامك سهـل وجبـال =جبـال تطولهـا وجبـال بعيونـك تخايلهـا
ومعوّض خير ياحيٍ وردت الماء بدون حبـال=يطول بك الوقوف وشربة المـاء ماتحصّلهـا
وقوفك عند راس البير مايسقيـك لـو فنجـال =ولاينفعك شوف الجمـه اللـي منـت طايلهـا
ومعوّض خير ياحيٍ خدعك من الرجال أشكال = تشوف أشكالها وتحطها أرفـع مـن منازلهـا
تعلّم من زمانك لاتصير من أجهـل الجهـال = ترى في كل يـوم تجيـك عبـره لاتجاهلهـا
إذا ربي وهب لك عقل تلقى في الرجال رجال = تعرف اللـي يطلّـع قيمتـك واللـي ينزلهـا
ترى من بعض مايندي الجبين ويحرج الرجال = لياسـاق الميانـه فـي نـفـوسٍ ماتقبّلـهـا
ومهما شفت في صاحبك من نخوه وطيبة فال =ترى بعض السجايا كثـرة الإلحـاح يقتلهـا
معاريف الرجال ديون وديون الرجـال ثقـال = لياصرت متعافي ليش تغـرق فـي جمايلهـا
رصيدك في حياتك سمعتك مع طيبيـن الفـال =رجال الطيب والمعروف بالمعـروف عاملهـا
ولاتبدي بجاهك فـي مقـامٍ مايسـر الحـال =ولاتشفـع لـنـاسٍ ماتنومـسـك بفعايلـهـا
لياجاتك تعذّرهـا مـدام العـذر لـه مدخـال= ووقت الجد قول لهـا الصحيـح ولاتجاملهـا
وخذ مني نصيحـه لاتصـدق كـل ماينقـال=يجـرك للنميمـه ليـن يطرحـك بحبايلهـا
يجيلك ناقـل النمّـات بهـروجٍ تغـث البـال = سوالف في قفاك وحظك أطيب يـوم تجهلهـا
يبـرر بالحميـه والصداقـه شينـة الأفعـال = يجمّـل صورتـه بعلومـه اللـي ماتجمّلهـا
ولو كانت حميه فيك رد المخطيه فـي الحـال =ولاكان إستمعها فـي قفـاك وجـاك شايلهـا
ترى من جاب لك ودّى وهذي عـادة النقـال = يحاول يقتنص من فمك كلمـه لأجـل ينقلهـا
ومثل ماقال عندك راح عنك وعند غيرك قال =وزوّد عشر فوق الكلمه اللـي كنـت قايلهـا
تجنّب مجلسه لاتجلس إلا مع كريـم خصـال = تحمّـل ميلتـه وإن ملـت ميلتـك يتحمّلهـا
ولاتصبر على الجار الردي لوهي ثلاث ليـال = تضـرك جيرتـه لوكـان بيبانـك تقفلـهـا
وبيع الدار بأول سومةٍ تعرض علـى الـدلال = ورزقـك عنـد ربٍ كاتـب اللقمـه وكافلهـا
وبنتك لاتزوجها الردي لوهـو كثيـر المـال= تربيهـا علـى الطـالات وتشـوّه سلايلهـا
وكم من لاش يرمي خيبة إبنه فوق راس الخال = لوإن الخال من روس الرجال ومـن دلايلهـا
ليامنك عرفت تميّـز الطيّـب مـن البطـال=وفادتك التجارب في الحيـاة وفـي مسايلهـا
وكشفت الفرق مابين الصحيح وحيلة المحتـال =وتعلمت الفراسه فـي الوجيـه اللـي تقابلهـا
بعد هذي ترى مالك غنى عن صحبة العقّـال = يدلونـك بـرايٍ ينقـض الدعـوه ويفتلـهـا
يقولون الرجال اللي سوالفهـم حِكـم وأمثـال = ليامن ضاعت الحيلـه يـدل القـوم عاقلهـا
نصيحة واحدٍ جرّب وشاف من الزمان اهوال= يقدّم لـك خلاصـة هجـرةٍ جـرّب هوايلهـا