وين اتجاهك يالغيوم الثقيله = ماجابت اخبارك محطات الارصاد
سوقي سحابك للديار المحيله = لك والعطاشا والملاهيف ميعاد
يخيلك اللي ساهراً طول ليله = هم وغثا بال وهواجيس وسهاد
اغيب واسرح في مسافه طويله = وافيق والقى الشعر بالفكر ينقاد
يشوقني نوح الحمام وهديله = وانا بحضوة كيف والسهر معتاد
فنجالاً اشقر زايداً قوس هيله = والليل ونجوم السما جمع وافراد
مجنون وبكفّي زناد و فتيله = عاقل و لا عندي فتيله و لا زناد
افخر بديني واعتزي بالقبيله = شمّر سنادي يوم كلاً له سناد
هذي حياتي واعتبرها جميله = فقير واغنى شخص ما جامل اضداد
والوقت غاراته جسام ومهيله = هولاً يبث الرعب بأرواح وجماد
يسلم به الكافر ويسجد نفيله = ويكفر به المسلم على روس الاشهاد
طمس الحقايق والكوارث حصيله = نقفور يرقص غي واولاده اسياد
دمع اليتيمه فاض من ينتخي له = تصرخ له بلاداً وتغرق به بلاد
مات الوفا بأيدين الانذال غيله = والناس بالدنيا ضحيّه وجلاّد
كليب من بعده هيام الجليله = ولازال ابو ليلى عن الثأر نشّاد
لله درك يالسيوف الصقيله = ( ماتشتكين من الصدأ وسط الاغماد )
كان ابرهه يشعب على الدرب فيله = قولو له اقبل 0 طير ابابيل صيّاد
لابد للعرّاف خطه بديله = والاّ انكشف كذبه على جمع الاوغاد
على شخوص الارض ضاع الدليله = منجوم والاّ صايبه غيض وعناد
الغايه اللي سابقتها وسيله = مطامع الروّاد بأفكار الانداد
عين الرضا عن كل عيباً كليله = قبلي يقوله شاعراً بأمة الضاد