نظرة عيونك متى مره تراضيني=احلم خجلها يلفـّـك مثلما المشنوق
ما تذكر انك بدون اسباب تجفيني=وارحل مع الصمت ما تسمع لنا منطوق
الحين دورك وحان الوقت تعفيني=وحان دوري امارس قسوتك وتذوق
لا تقول ما اقدر ومن ذا الدور خليني=يا تلبس الدور يا تهدى معي وتروق
عشقت كلك وانت اقساط تعطيني=كلي عطيتك من اسفل شيّ لا خر فوق
تدري مكانك ومحطوط في وسط عيني=لكن صدري ضلوعه من جفاك مشقوق
بعدي ارقــّـع جروحك في شراييني=وان جيت اعاتب احسك منخمص مخنوق
تضرب وتبكي وتسبقني تشاكيني=وتحطني في خزينه قفلها مسروق
اهرب والقاك في عبــّـك تخبيني=محروق منك وتزعم انك المحروق
مليون مره اقلك ليش ناسيني=كافي تحاصر جنوني داخلك في طوق
صافي انا جيت ما ودّك تصافيني=من قبل اشوفك وعشقك داخلي مخلوق
اقول فينك ولا تسال انا فيني=ودّك تزيد في عذابي وانا ميت شوق