شبكة رهب الأدبية-ريما محمد السديري - العمر راح ولابقى كثر ماراح

العمر راح ولا بقى كثـر مـا راح
ولاني على الدنيـا كثيـر الحسايـف

لو طاح حظَي شامخ الراس ما طاح
والمرجله ما هيب كسـب الوظايـف

الموت حق وودي امـوت وارتـاح
ولايهستربـي فــراق الـولايـف

دنياً خسارتهـا تسـاوت والاربـاح
لا قلـت هانـت عـوَدت للنكايـف

متحري ٍ برق الامل..بـس مـا لاح
وآجـر موَالـي بـروس النوايـف

واخفي طعون العشق والعشق فضَاح
وانا من الفرقا على القلـب خايـف

وان كان تنشدني عن الحال يا صـاح
حالي على عهدك مثل منـت شايـف

أسهر واجاوب نايح الـورق لا نـاح
مليت انا من طول صمت الشفايـف

يابـو جبيـن ٍ كنَـه البـدر وضَـاح
من تحت ليـل ٍ كاسـي ٍ للردايـف

وعيون دعج ٍ والهدب صفـة رمـاح
من تحت قوسيـن ٍ تلاقـى نصايـف

والعنق عنـق الريـم والقـد ذبَـاح
في وصفها تعجز جميـع الوصايـف

حبَه غزاني بـاوَل العمـر واجتـاح
ثلثيـن قلبـي والضلـوع النحايـف

كذا بلا عسكر بـلا حشـد وسـلاح
من نظرة ٍ والبـاب دونـه مسايـف

في ديرة ٍ عطر الشذا بارضها فـاح
صوب الجنوب أحلى ديار المصايف

من يومها في بحر الاشـواق سبَـاح
والحقت نفسي في هواهـا كلايـف

آجيه واقول ابتـدى ليـل الافـراح
واقفي دموعي فوق خـدَي ذرايـف

ياخذ مزاحي جـدَ والجـدَ بمـزاح
وفي عينهـا تكبـر علـومٍ خفايـف

فالصيف وعده كنَـه الثلـج لا سـاح
واقبل معاذيـره لـو العـذر زايـف

كريـم بالفرقـا مواصيلـه شحـاح
يهوى جفا قلـبٍ للاحـزان عايـف

يا زين خايف سـدَي اليـوم ينبَـاح
وانا اتعـرَض للسيـوف الرهايـف

تكفى تـروف بخافـقٍ كلَـه جـراح
وتصير لي بالشرع يا زين لحايف

والا تراني باقضـي العمـر سـوَاح
وآجـر موَالـي بـروس النوايـف

ما دام مابه بالعمـر كثـر مـا راح
ماني على الدنيـا كثيـر الحسايـف